هرات ښار (پژواک ٨ تله ٩٢): د هرات والي وايي، چې د هرات د بنديانو نهه ورځنى د نه خوړلو اعتصاب پاى ته ورسېد.
د هرات زندان نږدې دوه زره بنديانو نهه ورځې وړاندې د نه خوړلو اعتصاب کړى و، چې ډېرى يې سياسي دي، د نامناسبو شرايطو، دوسيو ته د نه رسېده ګۍ او د ولسمشر د فرمان په اساس د دوی له بنده نه ازادولو په اعتراض د ډوډۍ نه خوړلو پر اعتصاب لاس پورې کړى وو.
د هرات والي فضل الله وحيدي نن ماښام پژواک خبري اژانس ته وويل، چې د ولسمشر حامد کرزي له حکم سره سم د قاضي ګلرحمن په مشرۍ يوه پلاوي له اعتصاب کوونکو سره وليدل.
د ده په خبره، پلاوي د بنديانو غوښتنې واورېدې او د ستونزو د هواري ژمنه يې ورسره وکړه، چې په دې سره بنديانو خپل اعتصاب پاى ته ورساوه.
هغه زياته کړه، چې د بنديانو تر ټولو بنسټيزه غوښتنه د هغوى دوسيو ته په وخت لاسرسى و، چې پلاوي د هغوى د ټولو دوسيو له سره د غور او څېړنې ډاډ ورکړ.
د هغه په وينا، د بنديانو ډېرى غوښتنې قانوني او د حل امکانات يې ډېر دي.
د اعتصاب کوونکو بنديانو يوه استازي او د شينډنډ د ولسي شورا غړي حاجي داوود خان له پژواک سره په خبرو کې د زندانيانو د اعتصاب موضوع تاييد کړه.
خو هغه هيله څرګنده کړه، چې ورسره شوې ژمنې بايد پلې شي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن