کابل (پژواک ٢٤ چنګاښ ٩٣): ټاکل شوې نن د ولسمشرۍ نوماندان ډاکتر اشرف غني احمدزى او ډاکټر عبدالله عبدالله “د ملي يووالي حکومت” د جوړښت په اړه يو له بل سره ليدنه او خبرې وکړي.
د دغه نوماندانو د ټاکنيزو دفترونو مسوولين وايي، چې دغه خبرې اترې نن له غرمې مخکې ١١ بجې د ډاکټر احمدزي په کور کې تر سره کېږي او په پام کې لري چې دا لړۍ به دوام ولري.
د ډاکټر عبدالله د ټاکنيز دفتر غړي فضل الرحمن اوريا پژواک خبري اژانس ته وويل، چې د دې خبرو اترو محور د ملي يووالي حکومت د جوړښت موضوع ، چې د ملګرو ملتونو او د امريکا د بهرنيو چارو وزير او دواړو نوماندانو په شتون کې پرې هوکړه شوې وه؛ ده.
نوموړي وويل: ((د دواړو ټيمونو (تحول او تداوم او اصلاحات او همپالنه) نن په خپلو کې ګډه ناسته لري. په دې ناسته کې به د ځينو موضوعاتو په اړه نظريات تبادله شي، چې له دې ډلې يو هم د دوى تر منځ د ملي وحدت د حکومت پر تشکيل بحث کول دي.))
اوريا ونه غوښتل، چې اوسمهال د دې هوکړې د جزئياتو په اړه معلومات ورکړي، خو هغه څه چې په دې وروستيو کې ډاکټر عبدالله عبدالله مطرح کړي، ناکام نوماند ته د اجرائيوي شورا د رياست څوکۍ ورکول دي، چې وروسته به د اساسي قانون په بدلون سره د لومړي وزير په څوکۍ بدله شي.
که څه هم د اشرف غني احمدزي په مشرۍ د تحول او تداوم ټيم د دغه پسټ رامنځته کول نه ردوي، خو وايي چې د دواړو نوماندانو تر منځ په خبرو کې دا ډول هوکړه نه ده شوې.
ښايي چې د نظرياتو دغه تناقض هم د نني بحث له موضوعاتو څخه وي.
له بلې خوا د تحول او تداوم ټيم نننۍ ناسته د ولسمشرۍ د دواړو نوماندانو د ليدنو کتنو د پيل يو نمايش ګڼي.
د ياد ټيم يوه وياند نعمان شينواري پژواک خبري اژانس ته وويل: ((نن تشريفاتي او مقدماتي ناسته ده، تفصيلات به يې وروسته روښانه شي، ښايي تسلسل ولري، خو نن د ورځې يوولس بجې ښاغلى ډاکټر عبدالله د ډاکټر صاحب اشرف غني کور ته راځي او ناسته لري.))
دا له هوکړې وروسته د دواړو نوماندانو تر منځ لومړۍ ناسته ده.
ټاکل شوې چې د ولسمشرۍ د نوماندانو تر منځ د هوکړې له مخې په ټاکنوکې ټولې څه باندې اته ميليونه کارول شوې رايې د نړيوالې ټولنې، نوماندانو او د افغانستان لپاره د ملګرو ملتونو مرستندوى دفتر د څارونکو په شتون کې له سره وشمېرل شي.
د ټاکنو کمېسيون چارواکي وايي، چې ډېر ژر به کابل ته د رايو د صندوقونو لېږد پيل شي او څېړنه به يې درې اونۍ وخت ونيسي.
د رايو بيا تفتيش د دې لامل شو، چې د نوي ولسمشر د لوړې مراسم چې ټاکل شوې وه د کوچني اختر په ٥مه نېټه ترسره شي وځنډېدل. ولسمشر حامد کرزي د ولسمشرۍ د دواړو نوماندانو او د يوناما د رييس هغه غوښتنه رد نه کړه، چې د لوړي مراسم دې وځنډول شي.
خو ولسمشر کرزي له ټاکنيزو کمېسيونونو غوښتنه کړې، چې دغه بهير ژر تر ژره بشپړ کړي، څو نوى ولسمشر وکولى شي د خلکو د رايو پر بنسټ کار پيل کړي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن