ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

“د طالبانو نوى مشر د نظامي چارو په پرتله قضايي برخه کې ډيره تجربه لري”

25 May 2016 - 16:22
25 May 2016 - 16:22

کابل (پژواک، ٥ غبرګولى ٩٥): د طالبانو نوى ټاکل شوى مشر د هغوی د واکمنۍ پر مهال د سترې محکمې د مرستيال په توګه دنده ترسره کړې او په محاکمو کې پراخه کاري تجربه لري.

وسله والو طالبانو د غبرګولي په ٥مه د يوې خبرپاڼې په خپرولو سره د امريکا په يوه بې پيلوټه هوايي بريد کې د خپل مشر ملا اخترمحمد منصور وژنه تاييد کړه او د ډلې لومړى مرستيال ملا هبت الله يې د نوي مشر په توګه اعلان کړ.

ملا هبت الله د کندهار د سپين بولدک ولسوالۍ اوسېدونکى، په قوم نورزى دى او شاوخوا ٤٧ کاله عمر لري، خو هغه تر اوسه د طالبانو د ملا اختر محمد منصور د لومړي مرستيال په توګه دنده ترسره کوله.

خو هغه د طالبانو د واکمنۍ پر مهال د کندهار د محکمې مشر او بيا وروسته د سترې محکمې د مرستيال په توګه يې دنده ترسره کړې ده.

طالبانو ته نږدې سرچينې وايي چې هغه د افغانستان په بېلابېلو سيمو کې او بيا د کډوالۍ پر مهال د پاکستان په ځینو مدرسو کې ديني زده کړه ترلاسه کړې ده.

سرچينې وايي چې هغه د شوروي اتحاد د يرغل پر مهال د مولوي خالص په مشرۍ د اسلامي حزب جهادي ګوند غړى و او وروسته يې د ملا اختر منصور سره يو ځاى يې جهاد کړى و.

د سرچينې د معلوماتو له مخې، ملا هبت الله اوس مهال د پاکستان د بلوچستان ايالت د کوېټې ښار د غوث اباد په سيمه کې اوسېږي.

پخوانى طالب چارواکى او د سياسي چارو کارپوه محمد حسن حقيار وايي چې د طالبانو تر سقوط وروسته، کله چې طالبانو بېرته ځانونه منظم کړل، نو ملا هبت الله اخند د پخواني مشر ملا عمر يو له نږدې او باوري ملګرو څخه و.

هغه زياته کړه چې هغه د ملا عمر تر مړينې پورې د سياسي کمېټې غړى او د قضايي کمېټې د مشر په توګه دندې ترسره کړې دي.

دا چې ملا هبت الله به د ډلې د مشر په توګه دا مهمه دنده په څه ډول پر مخ بوځي؟ حقيار وايي چې د طالبانو په اوسنيو مشرانو کې دى تر نورو ښه او باوري شخص دى.

دى وايي: ((د طالبانو ټول کارونه د اړوندو کمېسيونونو له خوا پر مخ وړل کېږي، ضروري نه ده چې د ډلې مشر دې کوم جنګي قوماندان وي، نظامي چارې اړوند کمېسيون او قوماندانان پر مخ وړي.))

د حقيارپه وينا، ملا هبت الله په اداره او محاکمو کې پراخه کاري تجربه لري او د ډلې نور مشران او غړي يې پرېکړو ته درناوى کوي.

login or register a new account.

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.
Exit mobile version