کابل (پژواک،٢٣کب ٩٥): د عدليې وزارت وايي، له قومي او غير ملي جوړښت نه د مخنيوي لپاره يې د لسګونو سياسي ګوندونو فعاليت جوازونه لغوه کړي او دا مهال يواځې ٦٠ ګوندونو ته د فعاليت جواز ورکړل شوى دى.
د عدليې وزارت وياند امان رياضت، نن په خبرې ناسته کې وويل چې د افغانستان سياسي جوړښت بنسټ پر ډيموکراسۍ، سالمو سياسي او ټولنيزو فعاليتونو ته لار هوارولو باندې ولاړ دى.
نوموړي زياته کړه: "زموږ غوښتنه دا ده چې ګوندونه او ټولنيز بنسټونه د قانون په رڼا کې د سالم سياسي او ټولنيزو فعاليتونو په چوکاټ کې رامنځ ته شي چې د قومي او غيرملي فعاليتونو مخنيوى وشي."
د هغه په وينا، تر اصلاحي هڅو وروسته، ٢٥٩٣ ټولنو او ٦٠ سياسي ګوندونو لپاره د فعاليت جواز ورکړل شوى دى؛ دا په داسې حال کې ده چې مخکې ١١٠ سياسي ګوندونو د فعاليت جواز درلود.
نوموړي همداراز وويل، تر اوسه په کابل کې ١٠٨٠ د معاملاتو لارښوونو دفترونو له عدليې وزارت څخه د فعاليت جواز تر لاسه کړى او د يادو بنسټونو له ثبت څخه تېر مالي کال څه باندې ١٩ ميليونه افغانۍ عوايد ترلاسه شوي دي.
د عدليې وزارت وياند روان کال کې د دې وزارت فعاليتونو او لاسته راوړنو د څرګندولو تر څنګ وويل چې له پخوا راهيسې د دولتي ځمکو غصب موضوع د خلکو اساسي او ملي ستونزه ده.
هغه زياته کړه: "عدليې وزارت په مختلفو ولايتونو کې د څه د پاسه ١٦١٩٤ جريبه ځمکې، ٢٧١ هټيو، ٦ انګړونو، يو اپارتمان او د زياتو پيسو غصب مخه نيولې ده."
د هغه په خبره، ډىرى ځمکې په کابل، بلخ، هرات او ننګرهار ولايتونو کې غصب شوې دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن