کابل(پژواک،۱۱غويی۹۷): ولسمشر محمد اشرف غني چارواکو ته امر کړی چې له خلکو او رسنيو سره دې په کابل کې پر خبريالانو د پروني بريد جزييات او حقيقتونه شريک کړي.
په پرونيو دوو ځانمرګو بريدونو کې چې د کابل ښار د نهمې امنيتي حوزې اړونده سيمه کې وشول د خبريالانو او رسنيو د عکاسانو په ګډون ۲۵کسان وژل شوي او د شپږ خبريالانو په شمول ۴۹کسان ټپيان شوي.
ددغو بريدونو مسووليت داعش ډلې منلى دى .
د ملي امنيت شورا ناسته چې نن په ولسمشرۍ ماڼۍ کې ترسره شوه او وروسته له دې چې امنيتي او دفاعي ارګانونو د پروني خونړي بريد په اړه خپل راپور وړاندې کړ، ولسمشر اړونده چارواکو ته دنده وسپارله څو د پروني بريد رامنځ ته کېدو څرنګوالی او امنيتي تشې دې وڅېړي او په اړه يې جزييات او حقيقتونه له خلکو او رسنيو سره شريک کړي.
نوموړي دغه راز د بيان ازادي او د ازادو رسنيو فعاليت د حکومت لپاره ارزښتمن وباله او زياته يې کړه چې پروني ترهګر بريدونه، د بيان پر ازادۍ بريد او د بشريت ضد جنايت دی او عاملان به يې د قانون او عدالت منګولو ته وسپارل شي.
په هغه خبرپاڼه کې چې د ولسمشرۍ ماڼۍ د مطبوعاتي دفتر له خوا پژواک خبري اژانس ته رالېږل شوې، ويل شوي چې د ملي امنيت شورا په نننۍ ناسته کې، په کابل په ځانګړې توګه د کابل د لوېديځ د امنيت خونديتوب په اړه خبرې وشوې او د هر اړخيزه تدابيرو نيولو په موخه لازمې لارښوونې و شوې.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن