کندهار (پژواک، ۱۳ لیندۍ ۹۷): په کندهار ښار کې د یوه غلچکي برید په پایله کې دوه تنه ووژل شول او د نښلول شوي ماین چاودنې یو پولیس افسر ټپي کړ.
دغه دواړه پېښې نن له غرمې وروسته شوې دي.
نن شاوخوا درې نیمې بجې د کندهار ښار د پنځمې امنیتې حوزې په سیمه کې د ګمرک ودانۍ ته څېرمه پر یوه موټر نښلول شوي ماین چاودنه وکړه چې یو تن په کې ټپي شو.
یوې امنیتي سرچینې پژواک خبري اژانس ته وویل، په دې چاودنه کې یو پولیس افسر ټپي شوی او موټر یې ویجاړ شوی دی.
د کندهار د والي ویاند عزیز احمد عزیزي چاودنه تاييد کړه ، خو ویې ویل په دې چاودنه کې یوازې موټر ویجاړ شوی او نور زیان نه لري.
د دې تر څنګ ناڅرګندو وسله والو نن له غرمې وروسته شاوخوا دوه بجې د کندهار ښار د ۱۴مې امنیتي حوزې په سيمه کې حکیمي پټرول پمپ ته څېرمه په یوه غلچکي برید کې پر دوو تنو ډزې کړي او دواړه یې وژلي دي.
د کندهار د والي ویاند عزیز احمد عزیزي وايي، وژل شوو کسانو د هلمند ولایت په امنیتي ارګانونو کې دنده لرله، خو دا لا کره نه ده چې د کوم ارګان اړوند وو.
دی وايي، برید کوونکي تښتېدلي خو پولیسو یې لټون پيل کړی دی.
یوې امنیتي سرچینې د نوم نه ښودلو په شرط پژواک خبري اژانس ته وویل، چې وژل شوو دوو تنو چې یو یې قوماندان دی، د هلمند د سنګوریانو په نوم ځواکونو کې دنده لرله.
سرچینه وايي، دغه کسان کندهار ته راغلي وو چې د وسله والو له خوا په نښه او ووژل شول.
وسله والو طالبانو تراوسه په دې اړه څه نه دي ویلي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن