کابل (پژواک، ۲ لړم ۹۸): د هېواد په شمال کې شاهین قول اردو وایي چې په بلخ ولایت کې په یوه هوایي برید کې له چاودېدونکو توکو ډک موټر ویجاړ او دوه ځانمرګي په کې وژل شوي.
د یادې قول اردو له خوا په یوه خپره شوې خبرپاڼه کې راغلي، تېره ورځ له غرمې وروسته پر یوه هاموې ټانک چې طالبانو د ځانمرګي برید په موخه له چاودېدونکو توکو ډک کړی و هوایي برید پرې وشو.
سرچینې زیاته کړې چې دا هوایي برید د بلخ ولایت د چهاربولک ولسوالۍ په شېخ تاش تیمور کلي کې د ځانمرګي پر موټر شوی چې په پایله کې موټر تخریب او دوه ځانمرګي په کې وژل شوي دي.
د شاهین قول اردو د یوې بلې خبرپاڼې له مخې؛ تېره ورځ د بلخ ولسوالۍ په پلاس پوش سیمه کې د وسله والو طالبانو او افغان امنیتي ځواکونو ترمنځ جګړه کې ۸ طالبان وژل شوي او دوه نور ټپیان دي.
سرچینې زیاته کړې، په دې جګړه کې چې له یوه ساعت یې لږ دوام درلود، د ملي امنیتي او دفاعي سرتېرو یو منسوب هم وژل شوی او یو بل ټپي دی.
وسله والو طالبانو تر اوسه په دې اړه څه نه دي ویلي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن