کابل (پژواک، ۴ غبرګولی ۹۹) : د خیبر پښتونخوا ایالت په پېښور ښار یوتن چې ویل کیږي د افغانستان اصلي اوسېدونکی دی، پولیسو تر وهلو ډبولو وروسته بربنډ کړی، ویډیو یې ترې اخیستې او په ټولنیزو شبکو کې یې خپره کړې ده.
د امریکا غږ ډیوې راډیو د راپور له مخې، دغه ځوان عامر نومیږي او د پېښور ښار تاکال سیمې کې اوسیږي.
په خپره شوې ویډیو کې لیدل کیږي چې د تاکال د پولیسو د پوستې له خوا نوموړی ځوان په دې جرم چې ګوندې پولیسو ته یې بد رد ویلي، نیول کیږي، بیا یې وهي ډبوي او د بدن ځینې برخې یې بربنډوي.
په ټولنیزو رسنیو کې ددې ویډیو تر خپرېدو وروسته د پښتونخوا پر پولیسو نیوکې ډېرې شوې چې په غبرګون کې یې د پېښور د پولیسو مشر د تاکال د پولیسو تاڼې د پولیسو درې مسوولین له دندې لرې کړل.
بلخوا د تاکال پر پولیسو چې کومه رسمي دولتي عریضه شوې، په هغې کې لیکل شوي چې د تاکال سیمې اوسېدونکی عامر چې د پولیسو له خوا ورسره زور زیاتی شوی، هغه د افغانستان اوسېدونکی دی.
بلخوا پر دې پېښې بېلا بېلو خلکو کلک غبرګونونه ښودلي دي، د پښتون ژغورنې غورځنګ مخکښ غړي علي وزیر په ټویټر کې ددې پېښې غندنه کړې او د پولیسو کړنه یې د انسانیت پر مخ تور داغ ګڼلې ده.
دپېښور د پولیسو مشر یا ایس ایس پيظهور اپریدي ویلي چې د تاکال تاڼې ایس ایچ او شهریار دندې یې ځنډولي دي، دوه پولیس یې نیولي او قضیه تر څېړنې لاندې ده.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن