پلخمري (پژواک، ٢٣ چنګاښ ٩٩): د بغلان امنيتي چارواکي وايي چې په دغه ولايت کې د طالبانو يوه ١٢ کسيزه ډله د سولې له پروسې سره يوځاى شوې ده.
د بغلان د ملي امنيت له لوري د چنګاښ په ٢٣مه پژواک خبري اژانس ته په رالېږل شوې خبرپاڼه کې راغلي چې د ملا نعمت الله مشهور په خاکباد په مشرۍ د طالبانو يوه ١٢ کسيزه ډله د سولې له پروسې سره يوځاى شوې ده.
سرچينه وايي چې ملا نعمت الله له خپلو ملګرو سره د دغه ولايت د خنجان ولسوالۍ په منجانه، ګزان، ګزه ګيل، سبزخوان او ځينو نورو سيمو کې د دولت ضد فعاليتونه ترسره کول.
خبرپاڼه کې راغلي: "دغه کسان د ملي امنيت د اوپراتيفي هلو ځلو په پايله کې له دولت سره يوځاى شوي دي. "
دغه راز د يادې ډلې قوماندان نعمت الله وويل چې طالبان د پرديو په دستور د خپل هېواد د ورانولو لپاره هلې ځلې کوي.
ده زياته کړه: "زه په دغه مسله پوه شوم چې دا هرڅه د پرديو په خبره کيږي، نو پرېکړه مې وکړه چې له خپلو ملګرو سره د سولې له پروسې سره يوځاى شم. "
همدارنګه د بغلان ولايتي شورا رييس صفدر محسني وويل چې د سولې له پروسې سره د يادو کسانو يوځاى کېدل به د خنجان ولسوالۍ پر امنيتي وضعيت مثبت اغېز وکړي.
د يادونې ده چې په تېرو څو کلونو کې د دولت زرګونه وسله وال مخالفين د حکومت د سولې له پروسې سره يوځاى شوي، خو ځينې داسې اسناد او شواهد بيا ترلاسه شوي چې ددغو کسان له ډلې يو شمېر بيا له څه مودې وروسته بېرته د وسله والو مخالفينو ليکو ته ورغلي دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن