کابل (پژواک، ١٢ تله ٩٩): د افغانستان اسلامي جمهوري دولت د مرکچي پلاويغړې فوزيه کوفي د ناروې د سولې شورا له لوري د نوبل د سولې جايزې د نوماندانو په نوملړ کې شامله کړل شوې ده.
د دې شورا له لوري په يوه خپره شوې خبرپانه کې راغلي چې فوزيه کوفي په افغانستان کې د سولې د هڅو له امله په دغه نوملړ کې شامله شوې او نوموړې د ښځو د حقونو، ډیموکراسۍ او منځلاري اسلام مدافع فعاله ده.
د ناروې د سولې شورا د فوزيې کوفي ترڅنګ د بې سرحده خبريالانو ټولنه، امريکايي وکيل بنيامين فيرينز، د نيوزيلنډ لومړۍ وزيره جسيندا اردين او د يو شان عدالت نوښت ټولنه هم د روان ميلادي کال د سولې نوبل جايزې د نوماندانو په نوملړ کې شامل کړي دي.
د ناروې د سولې شورا په ۱۹۴۵زېږديز کال کې فعاليت پيل کړی او تر دې مهاله يې ۲۵موسسې غړيتوب لري. دغه شورا د سولې د ټينګښت او د جګړې د مخنيوي په برخو کې فعاليتونه کوي.
د افغانستان حکومت د ناروې د سولې شورا ددغه اعلان هرکلى کړى دى.
د ولسمشر وياند صديق صديقي په ټويټر کې ليکلي چې د افغانستان اسلامي جمهوريت دولت په ياد نوملړ کې د فوزيه کوفي د نوم د شاملولو هرکلى کوي.
هغه زياته کړې: ((فوزيه کوفي د افغانستان د سولې د مذاکراتي پلاوي وياړلې غړې ده او په ياد نوملړ کې د هغې نوم شاملول د سولې او ښځو حقوقو ته د هغې د کار ستاينه ده.))
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن