کندهار (پژواک، ۸ لړم ۹۹): د کندهار په میوند ولسوالۍ کې پر یوه زرنج موټر سایکل چاودنه شوې چې په کې سپاره پنځه تنه وژل شوي او یو ټپي شوی دی.
پېښه د دغې ولسوالۍ په سرکارېز سیمه کې تېره شپه شوې ده.
د کندهار د امنیې قوماندانۍ ویاند جمال ناصر بارکزي پژواک خبري اژانس ته وویل، د میوند ولسوالۍ په سرکارېز سیمه کې د وسله والو طالبانو ځای پر ځای شوی ماین د ملکي وګړو پر یوه زرنج موټر سایکل چاودېدلی دی.
دی وايي، په زرنج موټر سایکل کې د یوې کورنۍ ۶ غړي سپاره وو چې د چاودنې له امله ۵ تنه وژل شوي چې درې ماشومان، یوه مېرمن او یو سپین ږیری په کې شامل دي او یو ځوان ټپي شوی دی.
د ده په خبره، تر پېښې سمدستي وروسته پولیس سیمې ته رسېدلي او ټپي وګړی یې روغتون ته لېږدولی دی.
بارکزی وايي، وسله والو طالبانو په دې ولسوالۍ کې پر امنیتي پوستو د بریدونو تر څنګ پر عامو لارو ماینونو خښولو ته هم زور ورکړی چې ډېر مهال په کې ملکي وګړو ته مرګ ژوبله اوړي.
وسله والو طالبانو په دې اړه څه نه دي ویلي.
په دې وروستیو کې د کندهار یو شمېر ولسوالیو ته سلګونه وسله وال راغلي او جګړې یې پیل کړي چې پر وړاندې یې د امنیتي ځواکونو له خوا عملیات روان دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن