مزارشريف ( پژواک، ۹ ليندۍ ۹۹) : په شمال زون کې د غوڅ ملاتړ ماموريت قوماندان ويلي، چې دوی به له افغانانو سره خپلو مرستو ته دوام ورکړي.
په شمال کې د ۲۰۹ شاهين قول اردو مطبوعاتي مسوول حنيف رضايي د ليندۍ په ٩مه، پژواک اژانس ته وويل، چې تېره ورځ په دغې قول اردو کې د شمال زون نظامي او ملکي چارواکو، شمال کې د غوڅ ملاتړ ماموريت قوماندان، د ملګرو ملتونو استازولۍ او د بشري حقونو کمېسيون ګډه ناسته درلوده.
رضايي زياته کړه، په ياده غونډه کې د طبيعي پېښو زيانمنو شويو او د وروستيو جګړو قربانيانو ته د بېړنۍ او پر وخت مرستې رسولو باندې ټينګار وشو.
نوموړي زياتوي، چې په ياده ناسته کې شمال زون کې د غوڅ ملاتړ ماموريت قوماندان جنرال اسګرماير له افغانانو سره د خپلو مرستو پر دوام ټينګار وکړ.
د شاهين قول اردو وياند زياته کړه، چې د غوڅ ملاتړ قوماندان په خپلو خبرو کې وويل، چې نړيواله ټولنه له افغانانو سره د مرستې په خاطر دغه هېواد ته راغلې او د مرستو دغه لړۍ به دوام وکړي.
حنيف رضايي همدا راز وويل، چې د همغږۍ يادې ناستې ته د شاهين قول اردو قوماندان جنرال هيبت الله عليزي په خپلې وينا کې د مرستو پر اغېزمن وېش لا ټينګار وکړ.
نوموړي زياته کړه، چې په غونډه کې د طبيعي پېښو زيانمنو شويو او د جګړې قربانيانو او د هغوی کورنيو ته د مرستې رسولو پر لارو چارو هم بحث وشو.
د رضايي په خبره، په غونډه کې د ملګرو ملتونو استازولۍ يا يوناما او د بشري حقونو کمېسيون استازو له اړمنو کورنيو او د جنګ له زيانمنو شويو سره د خپلو مرستو ډاډ ورکړ.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن