جلال اباد (پژواک، ۱۷ لېندۍ ۹۹): د ننګرهار حکومتي مسوولين وايي، اټکل کېږي چې سږکال به د بټي کوټ د مالټو له باغونو څخه ۱۹سوه ټنه مالټې راټولې او له پاکستان څخه به د مالټو د واردولو مخه تر ډېره ونيول شي.
د ننګرهار کانال اړوند په ۶۱۰ هکټاره ځمکه باندې د مالټو باغونه جوړ شوي او مسولين وايي، د حاصلاتو د لا زياتوالي په موخه يې تازه په ۴۳ هکټاره ځمکه باندې د مالټو نوي باغونه جوړ کړي دي.
د ننګرهار د والي وياند عطاء الله خوږياڼي د لېندۍ په ۱۷مه پژواک اژانس ته وويل، سږکال د کانال ادارې د مالټو باغونو ښه حاصل ورکړی چې د تېر کال په پرتله په کې زياتوالی راغلی دی.
دی زياتوي، اټکل دی چې د بټي کوټ ولسوالۍ په مربوطاتو کې له ۶۱۰ هکټاره باغونو څخه ۱۹سوه ټنه مالټې راټولې او بازار ته وړاندې شي.
نوموړي دا هم وويل، چې د کانال ادارې ته پاملرنه او پر وخت د مالټو باغونو ته د سرې او نورو کيمياوي درملو ورکړه د دې سبب شوې چې ننګرهار کې د مالټو حاصلات زيات شي.
دی هغه د معلوماتو له مخې، د مالټو د حاصلاتو راټولولو او خرڅلاو چاره خصوصي سکټور ته په قرارداد ورکړل شوې چې هم په کې خلکو ته د کار زمينه برابره شوې او هم د عوايدو د فرار او فساد مخه نيول شوې ده.
بلخوا د مالټو قرارداديان وايي، د زورواکو او غلو موجوديت دوی ته اقتصادي زيان اړولی او وايي، وسله وال غله او ټوپک لرونکي زورواکي له دوی څخه په زوره مالټې وړي.
د مالټو قراردادي نقيب الله وايي: ((والله دې زورواکو او غلو نه په تنګ يو، د ورځې مالټې وړي او د شپې هم، په زوره يې هم وړي او په غلا هم ، زورواکي دي وسله وال کسان ورسره وي، زموږ د چوکيدارانو پرې وس بر نه دی.))
د مالټو قرارداديانو غوښتنه وکړه چې امنيتي سرتېري بايد د شپې له خوا په فارمونو کې ګزمې وکړي چې د غلو مخه ونيسي.
د مالټو يو بل قراردادي اول ګل وايي، که پوليس د شپې له خوا ګزمې ووهي نو د غلو مخه به په اسانۍ ونيول شي.
په همدې حال کې د ننګرهار د والي وياند عطاء الله خوږياڼی وايي، د امکان تر کچې هڅه کېږي چې د باغونو ساتنه وکړي او مالټې خوندي وساتل شي، ځکه وايي، اوس دا د خلکو مال دی او د حکومت دنده ده چې ساتنه يې وکړي.
ننګرهار کې د مالټو باغونو مخينه څو لسيزې وړاندې ته رسېږي چې يو وخت يې حاصلات تر نورو هېوادونو هم انتقالېدل.
Views: 27
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن