مزارشريف (پژواک، ۲۴ مرغومی ۹۹): د بلخ پوليس وايي چې د تېرې يوې اوونۍ په اوږدو کې يې د بېلابېلو جرمونو په تور ۴۵ کسان نيولي دي.
د بلخ امنيې قوماندانۍ مطبوعاتي مسوول عادل شاه عادل د مرغومي په ۲۴مه پژواک اژانس ته وويل چې ياد مجرمين د مزار ښار په بېلابېلو ناحيو کې د کشفي ارګانونو معلوماتو پر اساس نيول شوي دي.
هغه زياته کړه، په نيول شوو کې هغه کسان شامل دي چې د غلاوو، وژنو، اختطاف او قماربازۍ پېښو کې ښکېل وو.
د نوموړي په وينا، د تېرې يوې اوونۍ په اوږدو کې د ۴۵ مجرمينو ترڅنګ يو شمېر وسلې هم د پوليسو له خوا نيول شوي دي.
عادل زياتوي چې په وروستۍ پېښه کې د سې شنبې په ماښام د وسله والو غلو يوه څلور کسيزه ډله په داسې مهال ونيول شوه چې غوښتل يې د مزار ښار په نهمه ناحيه کې د خوراکي توکو يو دوکان او د تېلو يو پمپ استېشن ولوټي.
د بلخ امنيې قوماندانۍ مطبوعاتي مسوول وايي چې نيول شوي ۴۵ مجرمين يې عدلي او قضايي ارګانونو ته سپارلي دي.
له دې سره د مزارښار اوسېدونکي غوښتنه کوي چې د جنايي پېښو په تړاو نيول شوو کسانو ته بايد له قانون سره سمه سخته سزا ورکړل شي.
د بلخ اوسېدونکي حميدالله پژواک ته وويل چې په وروستيو مياشتو کې د مزارښار امنيتي وضعیت تر بل هر وخت ډېر خراب شوی دی.
هغه زياتوی چې د ښار دننه وژنې، غلاوې او تښتونې اوج ته رسېدلې دي.
حميدالله وويل: ((موږ وينو چې هره ورځ پوليس د مجرمينو نيولو خبر ورکوي؛ خو هېڅ د جرايمو کچه ټيټه نه شوه.))
نوموړی وايي چې له نيول شوو مجرمينو سره بايد جدي چلند وشي څو نورو هغو ته د عبرت درس وګرځي.
د بلخ پوليس پر داسې مهال د لسګونو مجرمینو نيولو خبره کوي چې تېره ورځ د مزار ښار په زړه کې د ملي اردو منسوبينو پر يوه موټر وسله وال بريد کې د شاهين قول اردو درې ښځينه منسوبینې ووژل شوې او د يوه ډريور په ګډون دوه نور کسان ټپيان شول.
Views: 38
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن