کابل (پژواک، ۲۷ کب ۹۹) : د امریکا ولسمشر جو بایډن وایي له طالبانو سره د سولې په تړون ” ټینګ مذاکرات” نه وو شوي او فکر نه کوي چې په ټاکلې نیټه خپل سرتیري له افغانستانه اوباسي.
په دې تړون کې چې امریکا د طالبانو سره د ۲۰۲۰ کال د فبرورۍ په میاشت کې په قطر کې لاسلیک کړ، موافقه شوې وه چې د ۲۰۲۱ کال د مې د میاشتې تر پایه به ټول امریکایي عسکر د افغانستان نه وځي.
خو دامریکا ولسمشر جوی بایډن د اې بي سي امریکایي تلویزیون سره په مرکې کې چې نن چارشنبه، خپره شوه، ویلي چې دا به د امریکا لپاره “سخته” وي چې د ټاکلې نیټې سره سم له افغانستانه ټول عسکر وباسي.
هغه زیاته کړه چې په بشپړه توګه د عسکرو ایستل به ډیر وخت ونه نیسي.
جو بایډن د مې د میاشتې د لومړې نیټې د مهلت په هکله وویل: ” د متحدینو سره د عسکرو د شمیر د کمیدو په چټکوالي مشورې کوم. ښایي دا کار وشي خو سخته به وي. خو که وغځیږي هم، ډیر به اوږد نه شي.”
بایډن هم د پخواني ډونالډ ټرمپ په څیر ژمنه کړې چې په افغانستان کې به د امریکا تقریباً شل کلنه جګړه پای ته رسوي او شاوخوا ۲۵۰۰ امریکایي عسکر چې هلته دیره دي، بیرته هیواد ته ستانه کړي.
بل پلو طالبانو خبرداری ورکړی که امریکا د دوحې د تړون له مخې خپل ټول عسکر د افغانستان نه ونه باسي، ناوړه عواقب به ولري.
بایډن دا څرګندونې په داسې حال کې کړې چې د افغانستان د سولې په تړاو هسې تیزې شوې او ټاک شوې ده چې سبا په مسکو کې دامریکا، روس چین، پاکستان او قطر په ګډون د افغانستان د سیاسیونو او طالبانو ترمنځ ناسته جوړه شي.
دغه راز ټاکل شوې چې راتلونکې اپریل میاشت کې د ترکیې په استانبول ښار کې هم ورته ناسته جوړه شي.
Views: 487
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن