کابل (پژواک، ۱۹ کب ۱۴۰۰) : د کورنیو چارو سرپرست وزیر د ملګرو ملتونو د بشري حقونو له مشرې سره په لیدنه کې ویلي چې حکومت په عمومي عفوې سره د انتقامي فکر په له منځه وړلو کې پرمختګ کړی دی.
د کورنیو چارو وزارت لخوا په یوه خپره شوې خبرپاڼه کې راغلي چې د کورنیو چارو وزارت سرپرست وزیر خلیفه سراج الدین حقاني دا څرګندونې د ملګرو ملتونو د بشري حقونو له مشرې مېشل بیشلټ سره په لیدنه کې کړې دي.
سرچینې زیاته کړې ، ددې لیدنې پرمهال بیشلټ ومنله چې افغانستان کې له روانو ستونزو، یو شمېر یې د تېرې ادارې میراث او د ځینو ننګونو لامل د اقتصادي منابعو کمښت دی،
هغې ویلي : “موږ دې برخه کې د مرستې په هڅه کې یو.”
مېشل عفوه د ملي پخلاینې لپاره لوی ګام وباله او هیله یې وښوده چې بشري حقوقو ساتنې ته لا پاملرنه وشي.
په خبرپاڼه کې راغلي، خلیفه سراج الدین حقاني ډاډ ورکړ چې سرپرست حکومت عمومي عفوې سره د انتقامي فکر په له منځه وړلو کې پرمختګ کړی، نړیوالو سره د اعتماد سازۍ لپاره د دوحې تړون یو مثبت اصل دی، هیواد یې چاته تهدید نه دی او هڅه کوي تر څو هغو ضمني ستونزو ته هم حل ومومي چې تر نړیوالو رسیږي.
Views: 328
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن