اټلانټا (پژواک، ۱۸ وږی ۱۴۰۱): د امریکا د بهرنیو چارو وزیر انتوني بلینکن په یو ناڅاپي سفر د اوکراین پلازمېنې کیف ته تللی او د دغه هېواد له ولسمشر سره یې لیدلي دي.
د امریکا غږ د راپور له مخې، د اوکراین ولسمشر ویلي چې د امریکا د بهرنیو چارو له وزیر انتوني بلینکن سره یې د تروریستي هېواد په توګه د روسیې نومولو په ګډون یې پر بېلابېلو موضوعاتو خبرې وکړې.
هغه زیاته کړې: «قانوني واقعیت باید تل له حقیقي واقعیت سره مطابقت ولري او دا یو حقیقت دی چې روسیه په نړۍ کې د تروریزم تر ټولو لویه سرچینه شوې ده.»
د هغه په وینا: «نړۍ باید یو واضح سیګنال ترلاسه کړي چې د روسیې ترهګري به ونه بښل شي.»
د اوکراین ولسمشر ویلي چې له تېرو اتو ورځو راهیسې یې له رویسې خپله زر کیلومتره مربع خاوره ازاده کړې ده.
زیلینسکي ویلي: «زه له هر هغه چا مننه کوم چې دا کار یې وکړ، زه د اوکراین د هر بیرغ لپاره چې په دې ورځو کې ځړول شوی، د اردو او استخباراتو له افسرانو او ځانګړو خدماتو څخه مننه کوم.»
د امریکا د بهرنیو چارو وزیر انتوني بلینکن له زیلینسکي سره له کتنې وروسته په یوه بیان کې ویلي: «د اوکراین د لومړۍ کرښې غیرمعمولي مدافعین د خپل هېواد د ازادۍ لپاره په زړورتیا سره مبارزې ته دوام ورکوي.»
هغه د امریکا د ولسمشر جو بایډن پر هغې ژمنې – چې د اوکراین ملاتړ به تر هغه وخته پورې چې اړتیا وي، کوي، ټینګار کړی دی.
Views: 115
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن