Pajhwok Afghan News

له هرات څخه ۱۲ ټنه جلغوزي المان ته صادر شول

کابل (پژواک، ۹ لړم ۱۴۰۱): د صنعت او سوداګرۍ وزارت وایي، د ۴۰۰زره امریکايي ډالرو په ارزښت ۱۲ ټنه د جلغوزي مغز لومړنۍ جوپه له هرات ولایت څخه المان هېواد ته صادر شوې ده.

د صنعت او سوداګرۍ وزارت په خپله ټویټرپاڼه کې د دغه مطلب څرګندولو ترڅنګ لیکلي چې دغه جوپه په معیاري بسته‌بندۍ او مناسب قیمت المان ته صادر شوې ده.

د صنعت او سوداګرۍ وزارت همداراز ویلي: «دغه وزارت د هېواد د صادراتو تصاعدي وده په تېر یوه کال کې د دولتي او خصوصي سکتورونو ترمنځ د صادقانه همغږۍ او همکارۍ محصول ګڼي.»

دا په داسې حال کې ده چې د تلې په ۱۸مه هم ۲۰ ټنه جلغوزي د دوبۍ له لارې چین ته صادر شو.

د افغانستان په سویل او سویل‌ختیځو برخو کې د جلغوزي پراخ ځنګلونه د دې لامل شوی چې دغه هېواد په سیمه کې د جلغوزي حاصلاتو لپاره ښه فرصتونه ولري.

د راپورونو له مخې، د افغانستان د جلغوزیو کلنی ارزښت شاوخوا دوه میلیارده ډالر اټکل شوی دی.

Views: 36

Exit mobile version