کابل (پژواک، ۳ غویی ۱۴۰۲): د امریکا متحده ایالتونو په سوډان کې خپل فعالیت ځنډولی او د دغه هېواد له پلازمېنې خرطوم څخه يې د سفارت مامورین او د هغوی د کورنيو غړي ایستلي دي.
په سوډان کې له شاوخوا یوې اونۍ راهېسې د دغه هېواد د پوځ او ملیشه ځواکونو ترمنځ د واک پر سر نښته رامنځته شوې او د روغتیا نړۍوال سازمان د معلوماتو له مخې، تر اوسه له ۴۰۰ ډېر کسان وژل شوي او تر ۳۵۰۰ ډېر نور ټپیان دي.
د امریکا غږ د راپور له مخې، د امریکا متحده ایالتونو په یاد هېواد کې د خپل سفارت چارې ځنډولې دي. د سوډان د چټک ملاتړ ځواکونو قوماندانۍ هم تائید کړې چې له دغه هېواده امریکایي ډیپلوماټان وتلي او د تخلیې په بهیر کې یې له امریکایي ځواکونو سره همغږي کړې وه.
په راپور کې راغلي، د متحده ایالتونو د بهرنیو چارو وزارت هم تائید کړه چې په خرطوم کې د امریکا سفارت خپل فعالیت ځنډولی او د سفارت ټول مامورین او د هغوی د کورنيو غړي یې ایستلي دي.
سره له دې چې د کوچني اختر د رخصتو په ورځو کې د اوربند اعلان شوی و، خو دغه اوربند ناکام شوی او جګړه بیا پیل شوې ده.
Views: 53
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن