مزارشریف (پژواک، ٧ غویي ۱۴۰۲): بلخ کې د ځمکني توتانو کرلو ته د کروندګرو لېوالتیا ډېره شوې او اوسمهال په دغه ولایت کې پر شاوخوا ۲۰۰ جریبه ځمکه یاد توتان کرل شوي دي.
کروندګر او سوداګر د ځمکني توتانو کرلو ته د لېوالتيا د ډېرېدو لامل د کوکنارو پر کښت بندیز ګڼي.
دوی دغهراز وایي چې ځمکني توتان ژر خرابېږي، نو حکومت باید سړې خونې ورته جوړې کړي.
عبدالرشید د بلخ ولایت نهرشاهي ولسوالۍ د لنګرخانې کلي یو بزګر وایي، چې د تېرو کلونو په پرتله یې له ځمکني توتانو ښه حاصلات ترلاسه کړي او بازار يې هم ښه دى.
عبدالرشید دغهراز وایي، که حکومت له کروندګرو ملاتړ وکړي، نو د ځمکني توتانو حاصلات او بازار به تر دې هم ښه شي.
عبدالودود د بلخ ولایت د بلخ ولسوالۍ یو بل کروندګر هم وایي چې په دغه ولایت کې د ځمکني توتانو کرلو ته د بزګرانو لېوالتیا ډېره شوې او لامل يې هم د کوکنارو پر کښت بندیز دى.
عبدالودود د کیمیاوي سرې او تېلو د بیې لوړوالي ترڅنګ د سړو خونو نشتوالی د دوی پر وړاندې له عمده ننګونو بولي او له حکومته یې د حل غوښتنه کوي.
د تازه میوو یو پلورونکی حیدر هم وایي چې ډېری مېوې په ځانګړې توګه ځمکني توتان ژر خرابېږي او حکومت باید د سړو خونو په جوړولو سره له کروندګرو ملاتړ وکړي.
يو بل هټۍوال سیدخان هم ورته غوښتنې لري او زیاتوي که حکومت له کروندګرو ملاتړ وکړي، نو افغانستان به د مېوې برخه کې بل هېڅ هېواد ته اړ نه شي.
بلخوا، د بلخ ولایت د کرنې، اوبو لګونې او مالدارۍ ریاست د ترویج مدیر محمد حسین عظیمي وایي چې د دغه ولایت په نهرشاهي، بلخ، دهدادي، چمتال او شولګرې ولسوالیو کې پر شاوخوا ۲۰۰ جریبه ځمکه ځمکني توتان کرل شوي دي.
هغه وایي چې د افغانستان د کرنې وزارت پر بنسټیزو پروژو کار کوي او پلان لري څو په نږدې راتلونکي کې د تازه مېوو د ساتنې لپاره سړې خونې جوړې کړي.
ځمکني توتان د بلخ ولایت ترڅنګ په ننګرهار او يو شمېر نورو ولايتونو کې هم کرل کيږي.
Views: 42
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن