جلالاباد (پژواک، ۱۰ چنګاښ ۱۴۰۲): د ننګرهار د عامې روغتيا رياست مسوولين وايي، د تېر لوى اختر په درېیو ورځو کې د ترافيکي پېښو له امله دوه کسان مړه او ۱۶۸ نور ټپيان شوي دي.
دوى وايي، یاد شمېر ټپيان د جلالاباد حوزوي روغتون، فاطمه الزهرا ولايتي روغتون او د ولسواليو روغتونونو ته لېږدول شوي دي.
د ننګرهار ولایت د عامې روغتيا رياست وياند نقيبالله رحيمي د چنګاښ په ۱۰ مه پژواک خبري اژانس ته وويل، د لوی اختر په درېيو ورځو کې په بېلابېلو سیمو کې د ترافیکي پېښو له امله ۱۷۰ ټپیان د ننګرهار سیمهییز تخصصي، بيبي فاطمة الزهرا ولایتي او د ولسوالیو یو شمېر روغتونونو ته انتقال شوي دي.
هغه زياته کړه، د ټپيانو له ډلې دوه يې د ژورو ټپونو له امله مړه شوي، خو يو شمېر نور بيا تر درملنې وروسته رخصت شوي دي.
د روغتيا رياست وياند وايي، په ټپيانو کې ډېری يې تنکي ځوانان دي چې د بېاحتياطۍ له امله يې ترافيکي پېښې رامنځته شوې دي.
بلخوا، د ننګرهار اوسېدونکي وايي چې د اختر په ورځو کې ترافيکي پېښې د ګړندي تګ له امله رامنځته کيږي.
د جلالاباد ښار يوه اوسېدونکي نجيبالله پژواک ته وويل، د اختر ورځو کې ځوانان په ډېرې بېغورۍ موټرونه ګړندي چلوي چې له امله يې ترافيکي پېښې رامنځته کيږي.
هغه د کورنيو له مشرانو او اړوندو مسوولينو غوښتنه وکړه چې له لایسنس پرته چاته د موټر چلولو اجازه ورنه کړي.
د يادونې وړ ده چې په تېرو درېيو مياشتو کې په ټول افغانستان کې د بېلابېلو ترافيکي پېښو له امله شاوخوا ١٦٠٠ کسانو ته مرګژوبله اوښتې ده.
Views: 94
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن