اسعداباد (پژواک ٣١ غبرګولى ٩١): د کونړ چارواکو د ايساف ځواکونو په هوايي بريد کې د ٢١ وسلوالو مخالفينو د وژلو خبر ورکړ.
د کونړ د والي وياند واصف الله واصفي د غبرګولي په ٣١مه پژواک خبري اژانس ته وويل، چې دا عمليات له پرون راهيسې په وټه پور او ماڼوګي ولسواليو کې پيل شوي دي.
هغه زياته کړه، چې د دغو عملياتو پر مهال د ايساف په هوايي بريد کې ٢١ وسلوال مخالفين وژل شوي دي.
د والي وياند وايي، دغه عمليات وروسته له هغه ترسره شول، چې وسلوالو مخالفينو په وټه پور او ماڼوګي ولسواليو کې د ګډو ځواکونو پر مرکزونو بريدونه وکړل.
د واصفي په وينا، په دغو بريدونو کې ګډو ځواکونو ته مرګ ژوبله نه ده اوښتې، خو په ځوابي عملياتو کې په وټه پور کې پنځه او په ماڼوګي ولسوالۍ کې ١٦ وسلوال مخالفين وژل شوي دي.
په ختيځ کې د ايساف ځواکونو مطبوعاتي دفتر وايي، چې په دغو هوايي بريدونو کې د دوى د لومړنيو معلوماتو له مخې، ١٩ وسلوال مخالفين وژل شوي دي.
سرچينې زياته کړې، چې په عملياتو کې ګډو ځواکونو او ملکي وګړو ته هېڅ ډول زيان نه دى اوښتى.
طالب وياند ذبيح الله مجاهد بيا وايي، چې په وټه پور ولسوالۍ کې درې بهرني سرتېري وژل شوي دي.
هغه زياتوي، چې په دغو بريدونو کې يو کورنى او يو بهرنى سرتېري هم ټپي شوي دي.
مجاهد د بهرنيو ځواکونو په هوايي بمبار کې د خپلو ملګرو وژل کېدل رد کړل.
Views: 6
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن