کابل (پژواک ٢٣ چنګاښ ٩١): د کابل ښار په ده افغانانو کې د حاجي عبدالرحمن جامع جومات د چنګاښ په ٢٣مه د ولسمشر حامد کرزي له خوا د پټۍ په پرېکولو سره پرانيستل شو.
په دې اړه په جوړې شوې غونډه کې د ولسمشر په ګډون د کابينې يو شمېر غړو، ديني عالمانو، سوداګرو او عامو خلکو برخه اخيستې وه.
ولسمشر کرزي يادې غونډې ته د وينا پر مهال د دغه جومات په جوړېدو خوښي وښوده او زياته يې کړه: ((دا د خوښۍ ځاى دى چې نن زموږ د خپلو افغانو په مالي لګښت او افغان انجنيرانو په هڅې داسې يو ستر جومات جوړېږي.))
هغه، جوماتونه د ورورولۍ د ټينګښت ځايونه وبلل او په ټولو افغانانو يې غږ وکړ، چې د هېواد د ښې راتلونکې او يووالي لپاره دې لاس په کار شي.
په نننۍ غونډه کې د افغانستان د سولې د عالي شورا مشر صلاح الدين رباني د حاجي عبدالرحمن جامع جومات جوړېدل يو نېک کار ياد کړ، د دنيا او اخرت لپاره يې ستره پانګونه وبلله.
نوموړي له ديني عالمانو وغوښتل، چې د سولې د ټينګښت لپاره دې کار وکړي او زياته يې کړه: ((هيله من يم چې د دغه جومات جوړېدل د سولې يو پيغام له ځان سره ولري.))
د مرحوم حاجي عبدالرحمن جامع جومات د انجنيرۍ مسوول انجنير رحيم ګل صميم پژواک خبري اژانس ته وويل، د دغه جومات د جوړولو کار په ١٣٨٠ کال کې پيل شوى و او ټاکل شوې وه چې په شپږو کلونو کې بشپړ شي.
د هغه په وينا، له دې امله چې د جومات په ودانۍ کې کارېدونکي توکي له بهر څخه راوړل کېدل او ځينو دولتي رسميات د دې لامل شول چې دغه پروژه له ځنډه سره مخ شي.
د سرچينې د معلوماتو له مخې، دغه جومات پر شاوخوا ٧ جريبه ځمکه په درېيو پوړونو کې جوړ شوى، چې په يو وخت کې د شاوخوا ١٠ زره لمونځ کوونکو د ځايېدو وړتيا لري.
هغه وايي، دغه جومات چې يو پوړ يې د مېرمنو لپاره ځانګړى شوى، يو کتابتون، د اودس ځاى او نور ملحقات هم لري.
د سرچينې د څرګندونو له مخې، د دغه جومات په کتابتون کې دا مهال ١٥٠زره بېلابېل کتابونه شتون لري او خلک کولى شي چې د مطالعې لپاره ترې ګټه پورته کړي.
د مرحوم حاجي عبدالرحمن زوى انجنير شعيب له پژواک خبري اژانس سره په خبرو کې وويل: (خوښ يم چې د پلار هيله مې نن پوره شوه.)
هغه د دغه جومات د مالي لګښت په اړه معلومات ورنه کړل خو ويې ويل، خداى ورکړى دولت و او د خداى په لاره کې ولګول شو.
Views: 4
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن