کابل (پژواک١٠ لړم٩١): د ټاکنو د خپلواک کمېسيون مشر له وسلوالو طالبانو او حزب اسلامي وغوښتل، چې په راتلونکو ټاکنو کې برخه واخلي او د قدرت د ترلاسه کولو لپاره له مشروع لارې را وړاندې شي.
د ټاکنو د خپلواک کمېسيون مشر فضل احمد معنوي چې نن (د لړم ١٠مه) يې په کابل کې يوې خبري غونډې ته وينا کوله، د دولت پر وسلوالو مخالفينو طالبانو او حزب اسلامي غږ وکړ چې تاوتريخوالى، د خلکو وژنه او د وينې تويول پرېږدي او په راتلونکو ټاکنو کې ونډه واخلي.
معنوي زياته کړه: “جګړه د حل لاره نه ده، د حل يواځېنۍ لاره دا ده چې موږ فضا برابره کړو. د افغانستان خلک چې د مشر، وکيل يا استازي په توګه پر هر چا باور کوي، هماغه سړى دې صحنې ته راشي او د افغانستان له خلکو دې استازيتوب وکړي.”
ده وويل، چې د کمېسيون مسوولين به د رايه ورکوونکي يا کانديد په توګه د مخالفينو په نوم ليکنه کې هم خپله بې طرفي وساتي.
وايي چې دغه کمېسيون به په ټاکنو کې په پوره توګه خپله بې پرېتوب وساتي او که څوک په ټاکنو د دغه کمېسيون د جعل کارۍ شاهد و، نو کمېسيون به يې مسووليت ومني.
په ياده خبري غونډه کې د افغانستان د ټاکنو خپلواک کمېسيون اعلان وکړ، چې د ولسمشرۍ او ولايتي شوراګانو ټاکنې به د ١٣٩٣ کال د وري په ١٦مه ترسره شي.
د ټاکنو د کمېسيون مشر وويل، چې د ټاکلي مهالوېش له مخې د ١٣٩٣ کال د ولسمشرۍ د ټاکنو پايلې به د غويي په ٢٤مه او د ولايتي شوراګانو د ټاکنو پايلې به د غبرګولي په ١٧مه اعلان شي.
د ده په وينا، که د ولسمشرۍ ټاکنې دويم پړاو ته ولاړې شي، نو دويم پړاو به يې د ١٣٩٣ کال د غبرګولي په ٧مه ترسره شي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن