کابل (پژواک ١٢ ورى ٩٣): د ولسمشر حامد کرزي په مشرۍ د وزيرانو شورا د افغانستان د کرکټ د نړيوالې جايزې پر اخيستو خوښي څرګنده کړه او ټولو هېوادوالو ته يې د هغې مبارکي وويله.
له ارګ څخه د وري په ١٢مه پژواک خبري اژانس ته په يوه رالېږل شوې خبرپاڼه کې راغلي، چې پرون د ولسمشر کرزي په مشرۍ د وزيرانو شورا د کرکټ په برخه کې د دې نړيوالې جايزې اخيستل، لويه لاسته راوړنه وبلله.
سرچينې زياته کړې چې دغه جايزه د افغانستان کرکټ بورډ ادارې او ملي لوبډلو د ښو لاسته راوړنو او برياوو په پايله کې ترلاسه شوې ده.
د افغانستان د وزيرانو شورا د دې جايزې په ترلاسه کولو ټولو هېوادوالو، لوبغاړو، د کرکټ مينه والو او د افغانستان کرکټ بورډ ادارې ته مبارکي ورکړې ده.
د يادونې ده، په ماليزيا کې د ليوريس په نوم د يوې نړيوالې ټولنې له خوا هر کال د لوبو په برخه کې نړيوالې جايزې ورکول کېږي.
دغه ځل د افغانستان کرکټ بورډ ادارې ته د (لوبې د روح ) په نامه نړيواله جايزه ورکړل شوه.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن