کابل (پژواک ٩وږى ٩٣): د افغانستان د ملي امنيت شورا پرېکړه کړې، چې که د ناټو تر راتلونکې غونډې نوى منتخب ولسمشر اعلان نه شي، نو د ناټو په غونډه کې دې د ملي دفاع وزير ګډون وکړي.
دغه څرګندونې د ولسمشر وياند ايمل فيضي د وږي په ٩مه له پژواک اژانس سره په يوه ځانګړې مرکه کې وکړې.
ټاکل شوې ده، چې د وږي د مياشتې په ١٣مه، ( د ستپمبر په ٤مه) دبريتانيا په ويلز ښار کې د ناټو دوه ورځنۍ سرمشريزه غونډه پيل شي .
دغه راز ټاکل شوې وه، چې په دې غونډه کې د افغانستان نوى منتخب ولسمشر ګډون وکړي ، خو د ټاکنيزو ناندريو له امله تراوسه نوى منتخب ولسمشر نه دى اعلان شوى او د ناټو غونډې ته هم د ګوتو په شمار ورځې پاتې دي.
ايمل فيضي وويل چې نن د ملي امنيت شورا په غونډه کې چې په ارګ کې جوړه شوې وه پرېکړه وشوه، چې که د ناټو تر راتلونکې غونډې نوى منتخب ولسمشر اعلان نه شي ،نو د ناټو په ياده سرمشريزه کې به د افغانستان ملي دفاع وزير ګډون وکړي.
ده زياته کړه چې له دې مخکې د ناټو سرمنشي ولسمشر حامدکرزي ته بلنه ورکړې وه ، چې په ياده غونډه کې ګډون وکړي ، خو ولسمشر کرزي د يوه ليک په ترڅ کې له ناټو څخه مننه کړې وه او ورته يې ويلي و، چې که د ناټو تر غونډې د ټاکنو خپلواک کمېسيون له خوا نوى منتخب ولسمشر اعلان شو ، نو هغه به په کې ګډون وکړي او که هغه اعلان نه شو ، نو د افغانستان د حکومت يو استازى به ورته معرفي شي .
د فيضي په وينا، چې که د ناټو له غونډې يوه ورځ مخکې هم د ټاکنو کمېسيون له خوا نوى منتخب ولسمشر اعلان شي او د لوړې مراسم يې هم نه وي ترسره کړي ، نو د ولسمشر کرزي له خوا به دغه نوى منتخب ولسمشر د يوه ليک په ترڅ کې د ناټو سرمشريزې ته ور معرفي شي او ګډون به په کې وکړي .
د افغانستان د ولسمشرۍ دويم پړاو ټاکنې، په داسې حال کې د ځنډ او ناندريو ښکار شوي، چې راتلونکې مياشت دوه نړيوال کنفرانسونه په لاره اچول کېږي؛ لومړی د ناټو سازمان سرمشريزه غونډه چې په دې کې به له افغان ملي ځواکونو د دوامدارو مالي مرستو او د ناټو د نوي ماموريت د پيلېدو پخلی کېږي .
دغه راز تر دې غونډې به څو اونۍ وروسته په نيويارک کې د ملګر ملتونو کلنۍ غونډه جوړېږي، خو د افغانستان ټاکنيزو ناندريو ته په کتلو سره، دا لا نه ده معلومه، چې په دې غونډو کې به څوک د افغانستان استازيتوب وکړي .
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن