کابل (پژواک، ۲۳ ليندۍ ۹۹): د افغان دولت مرکچي پلاوي غړې وايي چې د دوی مذاکراتي ټېم د رخصتۍ لپاره نه، بلکې د حکومت د رهبرۍ او سیاسیونو سره د مشورې لپاره کابل ته ځي څو د سولې پاتې بهیر چټک شي.
د افغانستان د سولې خبرو د مذاکراتي پلاوي غړې حبیبې سرابي دغه څرګندونې په یوه ویډیويي پیغام کې چې پژواک خبري اژانس ترلاسه کړی، کړې دي.
دا په داسې حال کې ده چې د طالبانو او افغان دولت د سولې خبرې شاوخوا درې میاشتې مخکې د قطر به پلازمېنه دوحه کې په رسمي ډول پیل شوې.
که څه هم د یادو خبرو په پیل کې د طرزالعمل په اړه اختلاف موجود و خو تېره اوونۍ دواړو لوریو پر یوه ۲۱ ماده ييز طرزالعمل توافق کړی دی.
په ورته وخت کې د طالبانو او افغان دولت مرکچي پلاوو اعلان کړی چې د دواړو پلاوو ترمنځ خبرې درې اوونۍ وروسته دوام پیدا کوي چې د دوی دغې پرېکړې غبرګونونه وپارول.
د افغان دولت د مذاکراتي ټېم غړې حبیبې سرابې په دغه ویډیويي پیغام کې ویلي چې د افغان دولت مذاکراتي ټېم غړي د حکومت له رهبرۍ او سیاسي مشرانو سره د مشورې لپاره کابل ته ځي.
هغې زیاته کړې چې د خبرو د تعیین په اړه د دواړو لورو، نړیوالو بنسټونو او د ټولنې مختلفو طبقو د ویډیو کنفرانس له لارې جدي بحث وکړ. د افغان دولت مذاکراتي ټېم غړي ځکه کابل ته ځي چې د خبرو د راتلونکو مرحلو په اړه مشورې او نظرونه واخلي څو په هېواد کې روانه جګړه ختمه او اوربند وشي.
د نوموړې په خبره، د افغانستان اسلامي جمهوریت پلاوی کابل ته د رخصتۍ لپاره نه بلکې د حکومت د مشرتابه او سیاسیونو د نظر او مشورې لپاره راځي څو دغه بهیر چټک شي.
هغې د مذاکراتو د اجنډا پر ټاکلو کار د خبرو عمده برخه وبلله او وویل: ((تمه دا ده چې جګړه ختمه او اوربند وشي.))
سرابي ویلي: ((هغه څه چې مذاکراتي پلاوي په دوحه کې ترسره کړل د سولې خبرو پیل و، دا یو جنجالي او سخت بهیر و چې مقابل لوري د حللارې په توګه د خبرو له انتخاب څخه ډډه کوله، خو بالاخره زمینه برابره شوه چې خبرې پیل شي، هغه اساسي ګام چې ډېر وخت یې ونیو د طرزالعمل ټاکل و چې دغه سند په بریالیتوب نهايي شو، دا یو اجرایوي سند نه بلکې یو لړ عمده اصول دي چې د مذاکراتو او د افغانستان د راتلونکي څرنګوالی په ډاګه کوي.))
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن