کابل (پژواک، ۴ وږی ۱۴۰۱): د افغانستان د کډوالو او بېرته راستنېدونکو چارو وزارت وایي، په ایران کې مېشت ۱۸۶۳ افغان کډوال تېره ورځ په داوطلبانه او اجباري ډول بېرته هېواد ته راستانه شوي دي.
دغه وزارت د هرات ولایت اړوند د اسلام کلا د کډوالو چارو امریت معلوماتو پر بنسټ لیکلي، د دغو کسانو له ډلې ۵۳۸ کسان په جبري او ۱۳۲۵ نور په داوطلب ډول هېواد ته راستانه شوي دي.
د سرچینې د معلوماتو له مخې، له دې ډلې یې ۱۲۶ کسان د مرستو ترلاسه کولو په موخه د کډوالو نړۍوال سازمان (IOM) دفتر ته ورپېژندلي دي.
د کډوالو او بېرته راستنېدونکو چارو وزارت د معلوماتو پر بنسټ، درې ورځې مخکې هم ۸۶۹ افغانان په جبري توګه له ایرانه ایستل شوي او ۳۸۱ نور په خپله خوښه بېرته هېواد ته راستانه شوي وو.
د راپورونو پر بنسټ، شاوخوا پنځه میلیون افغانان په ایران، څه باندې ۳ میلیون په پاکستان او یو شمېر نور په نورو هېوادونو کې ژوند کوي.
Views: 50
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن