هرات ښار (پژواک، ۶ وږی ۱۴۰۱): د هرات ولایت په رباط سنګي ولسوالۍ کې د خوښۍ مراسمو پر مهال په هوايي ډزو کې د یوې کورنۍ دوو کسانو ته مرګژوبله اوښتې ده.
د هرات د امنيې قوماندانۍ وياند محمودشاه رسولي د دغه خبر د تاييد ترڅنګ وويل، تېر ماښام د دغه ولايت د رباط سنګي ولسوالۍ اړوند په تورغونډۍ سيمه کې د يوې کورنۍ د خوښۍ په مراسمو کې هوایي ډزې شوې چې له امله یې یو ماشوم وژل شوی او یو بل کس ټپي دی.
د رسولي په وینا، د تورغنډۍ پولیسو یو کس – چې په دغو مراسمو کې یې هوایي ډزې کړې وې – نیولی دی.
هغه زیاته کړه، له نیول شوي کس څخه یوه تومانچه ترلاسه شوې او اوسمهال د امنیتي ځواکونو تر څېړنو لاندې دی.
په همدې حال کې، د سیمې یوه اوسېدونکي عبدالقیوم هم له پژواک سره خبرو کې دغه پېښه تایید کړه او ویې ویل چې په ولسوالیو کې د خوښي مراسمو پر مهال ډزې کول یو معمول کار دی او حکومت باید د دغه ناوړه دود مخه ونیسي.
Views: 29
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن