مهترلام (پژواک ۱۸ وری ۱۴۰۲): د لغمان مسوولین وايي، د دغه ولایت په الیشنګ ولسوالۍ کې د يوه کور د خونې چت لوېدلی چې له امله یې ۷ کسان مړه شوي او یوه نجلۍ ټپي ده.
د لغمان له طبیعي پېښو سره د مبارزې رییس قاري خیرمحمد غازي پژواک خبري اژانس ته وویل چې تېره شپه دوه بجې د الیشنګ ولسوالۍ په قلعه ټکې سیمه کې د یوه کور د خونې چت لوېدلی چې له امله یې پلار، مور او پنځه زامن یې مړه شوي او یوه ۸ کلنه نجلۍ ټپي شوې ده.
هغه زیاته کړه، دغه چت څو ورځې مخکې د تېز باران له امله زیانمن شوی و، خو کورنۍ يې بیارغولو ته پام نه و کړی او لوېدلی چې له امله يې ياده مرګژوبله اوښتې ده.
د سيمې یوه اوسېدونکي رفیعالله پژواک اژانس ته وویل، تېره شپه شاوخوا دوه بجې د شېرزاد په نوم یوه تن د کور چت لوېدلی چې له امله یې د نوموړي په ګډون د کورنۍ ۷ کسان مړه شوي او یوه وړه لور يې ژوبله شوې ده.
Views: 250
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن