مزارشریف (پژواک، ٢٨ غبرګولی ۱۴۰۲): د بلخ د چهاربولک ولسوالۍ زدهکوونکي وايي چې ښوونځي يې ودانۍ نه لري او د ښوونکو له کمښت سره هم مخ دي.
دوی زیاتوي چې د څښاک پاکو اوبو ته پر نه لاسرسي سربېره، په ګرمه هوا کې د خېمو لاندې زدهکړې کوي.
دوی دغهراز ټینګار کوي چې د درسي بهیر پیاوړتیا په موخه یې باید د ښوونکو د کمښت او د ښوونځيو د ودانيو نشتوالي ستونزې هوارې شي.
د چهاربولک ولسوالۍ د شیتۍ کلي د امام فخرالدين رازي ښوونځي یوه زدهکوونکي عزیزالله پژواک ته وويل چې دوى د ښوونکو له کمښت سره مخ دي او هم يې ښوونځى ودانۍ نه لري.
هغه وایي: «ښوونکي مو کم دي، باید د ښوونکو شمېر ډېر شي، غواړو موږ ته د اوبو څاګانې او ښوونځي ته مو ودانۍ جوړه شي، ځکه ګرمه هوا کې تر خیمې لاندې زدهکړې کوو.»
د یاد ښوونځي یوه زدهکوونکې لیلما هم وایي چې په اوړي کې تر لمر او ژمي کې تر واورې او باران لاندې زدهکړې کوي.
هغې له سرپرست حکومته غوښتنه وکړه چې د ښوونکو د کمښت ستونزه حل او هم یې ښوونځي ته ودانۍ جوړه کړي.
همداراز د چهاربولک ولسوالۍ د نوارد شلخي کلي د سلطان ابراهیم ښوونځي د شپږم ټولګی زدهکوونکی سمیرخان وایي، ښوونځی یې ودانۍ نه لري او هم د ښوونکو له کمښت سره مخ دي.
نوموړی هم له حکومته غواړي چې ښوونځي ته یې ودانۍ جوړه او هم یې د ښوونکو د کمښت ستونزه حل کړي.
په همدې حال کې، د یادې ولسوالۍ يو شمېر ښوونکي هم ورته شکايتونه لري.
د امام فخرالدین رازي ښوونځي سرښوونکی یارمحمد وایي، په دې ولسوالۍ کې ښوونکي کم دي او يو شمېر ښوونځي ودانۍ نه لري.
یارمحمد زیاتوي: «لومړۍ ستونزه مو دا ده چې ښوونځی احاطه او ودانۍ نه لري، دویمه دا چې زدهکوونکي د څښاک اوبو ته لاسرسی نه لري، درېیم دا چې څلور استادان لرو او د څوارلس ټولګیو سلګونه زدهکوونکو ته زدهکړې ورکوي.»
هغه له حکومت او مرستندويه ټولنو په ياده برخه کې د همکارۍ او جدي پاملرنې غوښتنه وکړه.
بل لورته، د چهاربولک د پوهنې رياست مسوولين هم تر ډېره يادې ستونزې مني.
د بلخ ولایت د چهاربولک ولسوالۍ د پوهنې آمر جمشید پژواک ته وويل، په دې ولسوالۍ کې د ښوونکو شمېر کم دى او ترڅنګ یې له ٥٠ څخه اووه ښوونځي هېڅ ودانۍ نه لري.
هغه زیاتوي چې ډېری ښوونځي په شخصي کورونو کې دي او دغه ستونزې یې د یاد ولایت له اړوندو مسوولينو سره شریکې کړې دي.
جمشید ډاډ ورکوي چې د یادې ولسوالۍ د پوهنې برخه کې ټولې ستونزې به حل شي.
د يادونې ده، څه موده وړاندې د بلخ د پوهنې رياست مسوولينو ويلي و چې په دغه ولايت کې ١٥٠٠ ښوونکي کم دي.
Views: 82
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن