شبرغان (پژواک، ۱۹ چنګاښ ۱۴۰۲): جوزجان ولایت کې د دوو کورنیو ترمنځ دېرش کلنه دښمني چې په ترڅ کې یې د دواړو لورو ۵۰ کسانو ته مرګژوبله اوښتې وه، د قومي مشرانو په منځګړیتوب پای ته ورسېده.
د جوزجان د سرحدنو، قومونو او قبایلو ادارې رییس مولوي غلامنبي صمیم وايي، د ډاکتر ظهور او حاجي عثمان کورنیو ترمنځ دغه دښمني د قومي مشرانو د پرلهپسې ناستو په پایله کې هواره شوې ده.
هغه زیاته کړه: «دغه ډول ناستې ګټورې دي او دواړو ښکېلو لورو له خبرو اترو وروسته نن د چنګاښ ۱۹مه وپتېیله چې دې دښمني ته د پای ټکی کېږدي.»
هغه زیاته کړه: «دښمني او جګړې د حل لار نه ده او په تېرو څلوېښتو کلونو کې زموږ ډېری خلکو د دغو شخړو زیاتې ترخې پایلې زغملې دي.»
د ده په خبره، هر هېوادوال باید په ټولنه کې د خلکو ترمنځ د رامنځته شوو شخړو هواري کې د منځګړي رول ولري او ترمنځ یې د سولې راوستو لپاره هڅه وکړي.
نوموړي زیاته کړه: «موږ ټول مکلف یو چې د کورنیو او قومونو ترمنځ شخړې له منځه یوسو او د مشرانو په لارښوونو عمل وکړو.»
د شخړې د یوه لوري غړي ډاکټر ظهور وویل: «له نن څخه ۳۰ کاله مخکې زموږ او حاجي عثمان کورنیو ترمنځ لفظي شخړه وشوه چې پر تاوتریخوالي واوښته او په دې موده کې د دواړو کورنیو ۵۰ کسانو ته مرګژوبله اوښتې ده.»
هغه زیاته کړه: «زموږ او حاجي عثمان کورنیو ترمنځ څو ځلې وسلهوالې نښتې وشوې چې تل به له دې امله زموږ د سیمې خلکو ته زیان اوښت او له دغه وضعیته اندېښمن وو.»
هغه د یادو کورنیو ترمنځ د شخړې له هواري د خوښۍ په څرګندولو وویل: «نن ډېر خوشحاله یم چې د سپینږیرو په منځګړتوب زموږ د کورنیو ترمنځ سوله وشوه او دېرش کلنه دښمني پای ته ورسېده.»
په ورته مهال، یو شمېر قومي مشران او دینې عالمان د جوزجان په اقچې ولسوالۍ کې د یادو ښکېلو کورنیو ترمنځ د سولې ټینګولو له امله د دغه ولایت د سرحدونو، قومونو او قبایلو چارو رییس له هڅو هرکلی او د شخړو پر دې ډول هواري ټینګار کوي.
په پای کې دواړو کورنیو یو سند لاسلیک کړ او ژمنه یې وکړه چې له دې وروسته به د سولې او ورورګلوۍ په فضا کې ژوند کوي او یو بل ته به زیان نه رسوي.
Views: 122
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن