لښکرګاه (پژواک ، ۲۷ تله ۱۴۰۲): هلمند کې ځایي مسوولین وایي چې د دغه ولایت په ګرمسېر ولسوالۍ کې یې شپږ درملتونونه او د خوراکي توکو پلورنځي وتړل او پنځه ټنه تاریخ تېر توکي یې وسوځول.
د هلمند د اطلاعاتو او فرهنګ ریاست مرستیال مولوي محمدقاسم ریاض د تلې په ۲۷مه، پژواک خبري اژانس ته وویل، د عامې روغتیا ریاست اړوند د ګرمسېر ولسوالۍ د روغتیا مسوول له خوا جوړ شوي ګډ کمېسیون د ورځې په جریان کې له ۶۰ کتنځایونو، درملتونونو او د خوراکي توکو له عمده پلورنځیو څارنه وکړه.
هغه زیاته کړه چې د دې څارنې پر مهال یې ۳ درملتونونه د تاریخ تېره درملو درلودلو په تور او ۳ د خوراکي توکو عمده پلورنځۍ یې د تاریخ تېرو خوراکي توکو پلورلو په تور وتړل.
نوموړی وایي، په یاد کمېسیون کې د هلمند عامې روغتیا ریاست اړوند ګرمسېر ولسوالۍ د روغتیا مسوول ترڅنګ د ولسوالۍ مقام، استخباراتو، قوماندانۍ او ښاروالۍ استازو ګډون کړی و.
د ریاض په وینا، کمېسیون د ورځې په اوږدو کې له درېیو درملتونونو او خوراکي توکو عمده پلورنځیو څخه شاوخوا ۵ ټنه تر وخت تېر درمل او خوراکې توکي ترلاسه کړي وو چې د ټاکل شوي پلاوي پر وړاندې یې وسوځول.
Views: 54
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن