کابل (پژواک ٢٩ مرغومى ٩٠): په افغانستان کې د ايساف ځواکونو عمومي قوماندان وايي، چې د طالبانو مشر ملا محمدعمر پر خپلو وسلوالو واک له لاسه ورکړى دى.
نوموړي دغه څرګندونې وروسته له هغه وکړې، چې تېره ورځ د هلمند په کجکي ولسوالۍ کې د يوه ځانمرګي بريد په ترڅ کې لس عام وګړي او درې پوليس و وژل شول.
په کابل کې دايساف ځواکونو مطبوعاتي دفتر له خوا د مرغومي په ٢٩مه پژواک خبري اژانس ته په يوه رالېږل شوې خبرپاڼه کې ويل شوي، چې د دوى عمومي قوماندان جنرال جان الن د هلمند پرونۍ پېښې په کلکه غندلې دي.
دغه راز په دغه ځانمرګي بريد کې شل نور ملکي وګړي ټپيان شوي هم وو.
جنرال الن ويلي: ((زه د ايساف په استازيتوب دکجکي په پېښه کې د وژل شوو او ټپي کسانو له کورنيو سره خپله غمرازي څرګندوم.))
هغه زياته کړې، چې دغه بريد سره يو ځل بيا وسلوالو مخالفينو وښوده، چې دوى تل د بې ګناه عامو وګړو د وژلو هڅې کړې دي.
د ايساف قوماندان ويلي: ((د افغانستان د خلکو پر وړاندې دغه بريد به زموږ د هغو هڅو مخه ونه نيسي، چې موږ يې په افغانستان کې د بيارغونې، پرمختګ او امنيت لپاره ترسره کوو.))
جنرال ا لن ويلي، دغه بريد وښوده، چې د طالبانو مشر ملا محمدعمر پر خپلو وسلوالو واک له لاسه ورکړى دى.
د هغه په وينا، که چېرې هغه پر خپلو وسلوالو واک او کنټرول درلوداى، نو د عامو افغانانو د وژلو مخنيوى به يې کړى و.
وسلوالو طالبانو د هلمند د پرونيو پېښو يواځې د نادعلي د پېښې مسووليت پر غاړه اخيستى او د کجکي په اړه يې څه نه دي ويلي.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن