دولت او سياست

کابل ته د امریکايي پلاوي له سفر وروسته، د افغانستان بهرنیو چارو وزارت د یوه امريکایي بندي جورج ګلزمن د خوشي کولو خبر ورکړی او ویلي یې دي چې دغه امریکايي وګړی د اسلامي امارت له لوري د یوه «بشردوستانه اقدام په توګه» خوشی شوی دی.

د افغانستان د بهرنیو چارو وزارت سرپرست د امریکا له یوه پلاوي سره په لیدنه کې ویلي، دا مهمه ده چې دواړه هېوادونه پر دې وتوانېږي چې مسئلې د خبرو له لارې حل کړي.

د هرات د ټولګټو رییس ترکمنستان کې د «سولې او باور» په نړۍوال کنفرانس کې ویلي، اسلامي امارت هڅه کوي، افغانستان د اوسپنۍ پټلۍ له لارې له سیمه‌يیزو هېوادونو، په ځانګړې توګه له ترکمنستان، ازبکستان، ایران او پاکستان سره ونښلوي.

د افغان او پاکستاني چارواکو د هوکړې له مخې، تر ۲۷ ورځو وروسته د تورخم دروازه د سوداګرۍ پر مخ پرانیستل شوه، او ټاکل شوې چې راتلونکې جمعې په ورځ مسافرو ته هم د تګ اجازه ورکړل شي.

کابل کې د اسلامي همکاریو سازمان سفیر د ریاست الوزراء د سیاسي معاونیت د دفتر له عمومي رییس سره په لیدنه کې ویلي، دغه سازمان له افغانستان سره همکارۍ او مرستو ته لېواله دی او هڅه کوي چې په لویو بنسټيزو پروژو کې ونډه واخلي.

د افغانستان د اوبو او انرژۍ وزارت سرپرست په کابل کې د ترکمنستان له سفیر سره په لیدنه کې ویلي، د ټاپ پروژې د لارې نقشه د دغه وزارت له لوري وروستۍ شوې او ډېر ژر به له ترکمن لوري سره شریکه شي.

ازبېکستاني پلاوي د کانونو او پټرولیم وزارت له سرپرست سره په لیدنه کې د افغانستان د کانونو د سروې، اکتشاف، استخراج، او د منرالونو د پروسس برخو کې د ګډ کار او دوه اړخیزو همکاریو په اړه خبرې کړې دي.

د افغانستان د بهرنیو چارو وزارت د اسرائیلو له لوري د غزې پر تړانګه د بریدونو بیا پیل غندلي او وایي چې اغېزناک هېوادونه دې د فلسطین له مظلوم ولس څخه خپل کلک ملاتړ څرګند کړي.

په افغانستان کې د یوه بل کال لپاره د یوناما د فعالیت له غځېدو سره هم‌مهاله، د اسلامي امارت ویاند وايي چې دغه بنسټ باید د افغانستان، ملګرو ملتونو سازمان او نورو هېوادونو ترمنځ د اړیکو پیاوړتیا لپاره هڅه وکړي.

د ریاست‌الوزراء اقتصادي معاونیت وايي، د اقتصادي کمېسیون د تخنیکي کمېټې له خوا په صادراتو کې د ښکېلو وزارتونو او ادارو لپاره د واحد سیسټم رامنځته کولو طرحه د تایید وړ وبلل شوه او د نهايي پرېکړې لپاره اقتصادي کمېسیون ته واستول شوه.

اسلامي امارت له ملګرو ملتونو، اروپايي ټولنې او نورو نړۍوالو بنسټونو غوښتي چې د افغان کډوالو ستونزو ته ځانګړې پاملرنه وکړي، څو د ګاونډیو هېوادونو د ناعادلانه پرېکړو له امله د هغوی حقوق پایمال نه شي.

د ملګرو ملتونو امنیت شورا اعلان کړی چې سبا (دوشنبه) به د هغه پرېکړه‌لیک په اړه رای اچونه وکړي چې په افغانستان کې د دغه سازمان د استازولۍ (یوناما) ماموریت د راتلونکي مېلادي کال د مارچ تر ۱۷مې غځوي.