کندهار( پژواک ،د کب ٥مه، ٩١) :د کندهار ښاروالۍ او ولايتي ادارې په ګډو هڅو د ښار له بېلا بېلو واټونو څخه د امنيتي موانعو د لېرې کولو لړۍ پيل شوه.
دغه امنيتي موانع (کانګرېټي دېوالونه) په تېرو څو کلونو کې د کندهار ښار د بېلا بېلو ادارو د ساتنې په موخه درول شوې و، چې د ښار ګڼ سړکونه او لارې يې د خلکو پر مخ تړلې وې.
په کندهار کې د دغو امنيتي موانعو د لېرې کولو لړۍ نن د کب په ٥مه پيل شوه او په لومړي ګام کې د کندهار ښار په لومړۍ ناحيه کې د ملي امنيت پر اداره را ګرځېدلې موانع لېرې شول.
په همدې مهال د کندهار ولايت مرستيال عبدالقديم پتيال پژواک خبري اژانس ته وويل، اوس د پخوا په پرتله په کندهار کې امنيتي وضعيت ښه شوى او دا اړتيا ليدل کېږي، چې د خلکو د ستونزو د هواري په موخه له سړکونو او واټونو امنيتي موانع لېرې شي.
هغه زياته کړه، د ښار بڼه به بيرته پخواني حالت ته را وګرځوي او دا لړۍ به تر هرې هغې ادارې ورسوي، چې ورباندې امنيتي موانع چاپېر شوي وي.
د کندهار ښاروال محمد عمر عمر وويل، د کندهار ښار لومړۍ، دويمه او درېيمه ناحيې هغه ځايونه دي، چې پکې امنيتي موانع ډېر او ګڼې لارې يې د خلکو پر مخ تړلې دي.
هغه زياته کړه، تېر څو کلونه خلکو په پر له پسې توګه د لارو د بندېدو له امله ستونزې منلي، خو هغه مهال بله چاره هم نه وه، ځکه نا امني زياته، د ځانمرګو بريدونو او چاودونو کچه هم لوړه وه.
د کندهار ښاروال وويل، په کندهار ښار کې دا مهال تر ٢٠٠٠ پورې دغه راز امنيتي موانع درول شوي، چې هغوى يې اوسمهال د بيرته لېرې کولو په موخه لاس په کار شوي دي.
په تېرو څو کلونو کې، هغه مهال چې د کندهار ښار په څو کيلومترۍ کې د وسله والو مخالفانو فعاليتونو زور اخيستى و او هره ورځ به يې چاودنې او ځانمرګي بريدونه کول، ګڼو نظامي او ملکي ادارو د خپلو ځانونو د ساتلو په موخه له خپلو ودانيو کانګرېټي خښتې را تاو کړې.
په دې موخه ځانګړو ساختماني شرکتونو کار کاوه، چې د يوې امنيتي خښتې بيه له ٨ تر ١٢ سوه ډالره وه او ډېر زيات لګښت ورباندې وشو.
خو په ولسواليو کې بيا بهرنيو ځواکونو د خپلو بېسونو د خوندي ساتو په موخه په زرګونو دغه راز امنيتي موانع درولي دي.
د کندهار اوسېدونکي هم د ولايتي ادارې د دغه اقدام هرکلى کوي او غوښتنه کوي، چې دغه کار دې په ټول کندهار ښار کې په يو شان پلې شي، چې د کندهار ښار ښکلا بيرته عادي حالت ته را وګرځي.
د کندهار ولايت مقام، پخوانۍ او اوسنۍ امنيه قومانداني، د ٢٠٥ اتل قول اردو قومانداني، د ملي امنيت رياست، د ملګرو ملتونو اداره، عدلي او قضايي ارګانونه، منډيګګ ماڼۍ، ټولې امنيتي حوزې، کندهار زندان او ګڼې نورې هغه ادارې دي، چې چاپېره ورباندې امنيتي موانع را ګرځول شوي دي.
