کندهار (پژواک ٢٩ ورى ٩٢): د کندهار امنيتي چارواکي وايي، چې په دغه ولايت کې يې د روانې اونۍ د عملياتو پر مهال د وسله والو مخالفينو د زکات ټولوونکي په ګډون ګڼ شمېر وسله وال مخالفين نيولي، وژلي او ژوبل کړي دي.
د کندهار د امنيه قوماندانۍ د امنيت امر سمونوال رحمت الله اطرافي د وري په ٢٩مه د ولايت مقام د رسنيو په مرکز کې خبري غونډې ته وويل، چې دغه عمليات په کندهار ښار او ولسواليو کې ترسره شوي دي.
هغه زياته کړه، د عملياتو په لړ کې يې ١٣ وسله وال مخالفين وژلي، ٤ ټپيان شوي او ٨ نور ژوندي نيول شوي دي.
ده وويل، پوليسو د کره معلوماتو پر بنسټ هغه تن هم نيولى، چې د وسله وال مخالفينو لپاره يې شاوخوا ١٥ سوه زره پاکستانۍ کلدارې د زکات په نوم له خلکو را ټولې کړې وې.
د نوموړي په وينا، له نيول شوي تن څخه پلټنې پيل شوي او د لومړيو معلوماتو له مخې، دغه پيسې د وسله والو مخالفينو د مالي سرچينو د تقويې لپاره راغونډې شوې وې.
دى وايي، په عملياتو کې١٠ کړۍ بېلابېل ماينونه، ٣ کلاشينکوفونه، ٤ مخابرې، يو موټر، يو موټر سايکل او يوه اندازه چاودېدونکي توکي هم نيول شوي دي.
بلخوا نوموړي په روانه اونۍ کې د جنايي پېښو او نشه يي توکو په تړاو د ٧ تنو د نيولو خبر هم ورکړ.
هغه زياته کړه، په ياده موده کې يې ٢٣ کيلوګرامه هيرويين، لس کيلوګرامه ترياک او ٨١٠ کيلوګرامه چرس هم نيول شوي دي.
اطرافي په کندهار کې د کوکنار اړولو د کمپاين په اړه هم معلومات ورکړل او ويې ويل، چې په ميوند، ارغنداب، پنجوايي، شاوليکوټ او تخته پل ولسواليو کې يې ٢٦٢٧ جريبه ځمکه له کوکنارو پاکه کړې ده.
