مرکزي اداره د کندهار ورزش ته پاملرنه نه کوي

<p>کندهار (پژواک، ٣ غويى ٩٢): د کندهار ولايت د اولمپيک چارواکي پر مرکزي ادارې نيوکه کړې، چې د سپورټ په برخه کې کندهار ته لازمه پاملرنه نه کوي.</p>

<!--break-->

<p>دوى وايي، چې په دغه ولايت کې په بېلابېلو سپورټي څانګو کې نارينه او ښځينه لوبغاړي لري، خو امکانات يې ډېر محدود دي.</p>

<p>هغوى وايي، په داسې حال کې چې مرکزي اداره ورسره په اړوند چارو کې د مور او ميرې سلوک کوي او د سپورټ د بېلابېلو څانګو لپاره اړوند لوبغالي او نورې اسانتياوې نه لري، بيا هم دلته سپورټ وده کړې ده.</p>

<p>دغه څرګندونې د کندهار ولايت د سپورټ امر محمدالله ګلالي نن (د غويي ٣مه) د ولايت مقام له رسنيو سره د اړيکو او معلومات په مرکز کې جوړې شوې خبري غونډې ته وکړې.</p>

<p>محمدالله ګلالي وويل، د اوسمهال لپاره په کندهار کې په نږدې ٢٥ بېلابېلو سپورټي څانګو کې ٣٦ زره لوبغاړي لوبېږي، چې د نارينه وو تر څنګ يې يوه برخه ښځينه هم دي.</p>

<p>هغه زياته کړه، په پلان کې لري، چې په روان ١٣٩٢ لمريز کال کې د ورزشي څانګو شمېر ٣٢ ته لوړ کړي، چې ورسره به د ورزشکارانو شمېر هم ٥٠ زره ته لوړ شي.</p>

<p>نوموړي پر مرکزي ادارې نيوکه وکړه، چې د سپورټ په برخه کې کندهار ته لازمه پاملرنه نه کوي.</p>

<p>ګلالي وويل، د سپورټ پر وړاندې لويې ستونزې د بېلابېلو لوبو لپاره د ميدانونو، روزنيزو مرکزونو او اړوندو نورو اسانتياوو نشتوالى دى.</p>

<p>د ده په  وينا، په وار وار يې له مرکزي ادارې غوښتي، چې دلته د ورزش مينه وال زيات دي او بايد ورته سمه پاملرنه وشي، خو تر اوسه يې کومه پايله نه ده لرلې.</p>

<p>دى وايي، که له کندهار سره د سپورټ په برخه کې د مور او ميرې سلوک پاى ته ورسېږي، نو په دې برخه کې به بې سارې لاسته راوړنې ولري.</p>

<p>ګلالي دغه راز خبر ورکړ، چې له ګڼو ستونزو سربېره د کندهار اته لوبغاړي يې د ملي ټيمونو په بېلابېلو څانګو کې شامل کړي دي.</p>

<p>د سپورټ او بدني روزنې امر وويل: ((پر مرکز له سختو فشارونو راوړو وروسته بالاخره وتوانېدو، چې د کندهار اته لوبغاړي د ملي ټيمونو په بېلابېلو برخو کې شامل کړو.))</p>

<p>د ده په خبره، له دې ډلې دوه تنه په فوټبال، څلور تنه په کرکټ او دوه د ځغاستې په ملي لوبډلې کې لوبېږي.</p>

<p>هغه وويل، چې د ملي ټيم دغو لوبغاړو د هېواد په کچه د ترسره شوو سياليو پر مهال ښه مقامونه هم خپل کړي دي.</p>

<p> </p>

<p>ګلالي په تېر ١٣٩١ لمريز کال کې د ترسره شوو لوبو په اړ هم معلومات ورکړل او ويې ويل، چې په دغه کال کې يې د نورو لوبغاړو د ښې روزنې او ملي ټيم ته د زياتو کندهاري لوبغاړو د جذب لپاره ګڼې سيالۍ هم ترسره کړې دي.</p>

<p> </p>

<p>هغه وايي، دغه سيالۍ د فوټبال، کرکټ، غېږ نيونې، سوک وهنې، فري پايټ، واليبال، باسکيټبال، ځغاستې او د بدن د ښکلا په څانګو کې د لسګونو لوبډلو تر منځ ترسره شوې دي.</p>

<p> </p>

<p>د ده په وينا، د يادو سياليو پر مهال يې نه يواځې A,B,C  لوبډلې جوړې کړې، بلکې د هېواد په کچه يې د سياليو د ترسره کېدو لپاره تکړه لوبغاړي هم ټاکلي دي.</p>