ګردېز (پژواک، ٢٤ ليندۍ ٩٥): په سوېل ختيځ زون کې د بشري حقونو خپلواک کمېسيون وايي چې سږ کال په دغه زون کې د ښځو پر وړاندې د تاوتريخوالي ٢٨٥ پېښې ثبت شوې چې يواځې ٣٤ يې د وژنو دي.
دغه څرګندونې د ليندۍ په ٢٤مه په مرکز ګردېز کې د بشري حقونو د نړيوالې ورځې په مناسبت جوړې شوې غونډه کې وشوې.
په سوېل ختيځ زون کې د بشري حقونو د خپل کمېسيون د ولايتي کمېټې د ښځو د برخې مشرې زرمينې شمس وويل چې سږ کال په دغه زون کې د ښځو پر وړاندې د تاوتريخوالي ٢٨٥ پېښې شوې دي.
هغې وويل چې په دې پېښو کې ۳۴ يې د وژنو دي چې اووه يې ځانوژنې او ٢٧ نورې يې ناموسي قتلونه دي.
شمس وايي چې ۱۰۹ ښځو د ځان وژنې هڅه کړې خو د کورنۍ د غړو له خوا يې يا مخه نيول شوې او يا هم د زهرو له خوړلو سره سم يې په روغتونونو کې درملنه شوې ده.
د دې په خبره، نورې پاتې پېښې وهل، ښځو ته نفقه نه ورکول، له خپلوانو سره نه ليدل او يو شمېر نور شامل دي.
په پکتيا کې د بشري حقونو د سيمه ييز دفتر د ښوونې او روزنې مسوول محمد يوسف ملاتړ پژواک خبري اژانس ته وويل چې دغه کمېسيون د پېښو د راټيټولو په موخه پوره هڅې کړې دي.
دی وايي شاوخوا درې زره کسانو ته چې ښځې هم په کې شاملې وې، د بشري حقونو په برخه کې ښوونه او روزنه ورکړل شوې ده.
دی وايي په دغو کسانو کې د مدني ټولنو غړي، ديني عالمان، قومي مشران، ماشومان، ښځې او نور نهادونه شامل وو.
په دې غونډه کې د مدنې ټولنې غړي انارګل وويل چې په دې وروستيو کې ښځې په خپلو حقونو پوه شوې او هڅه کوي چې ترلاسه يې کړي.
د هغه په اند، هغه مهال له ښځو سره تاوتريخوالى کېږي کله چې د خپل حق غوښتنه وکړي.
د يادونې ده، تېر کال په دغه زون کې د ښځو پر وړاندې د تاوتريخوالي ١٥٥ پېښې ثبت شوې وې.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن