په ګومل ولسوالۍ کې چاودنې ۱۱ پاکستاني پوځیانو ته مرګ ژوبله اړولې

ښرنه (پژواک، ٦ وږى ٩٦): د پکتيکا په ګومل ولسوالۍ کې پر پاکستاني پوځيانو چاودنه شوې چې په ترڅ کې یې شپږ پوځيان وژل شوي او پنځه نور ټپيان دي.

په ګومل ولسوالۍ کې يوې حکومتي سرچينې د وږي په شپږمه پژواک خبري اژانس ته وويل چې یاده چاودنه د دې ولسوالۍ په رادان سيمه کې شوې ده.

هغه وايي چې په چاودنه کې شپږ پاکستاني پوځيان وژل شوي او پنځه نور ټپيان دي.

ده زياته کړه: ((پاکستان پوځیان د افغانستان خاورې ته را اوښتي وو او دلته پرې چاودنه شوې ده.))

د رادان سيمې یوه اوسېدونکي امان الله پژواک ته وويل چې پر پاکستاني پوځيانو یاده چاودنه د افغانستان په خاوره کې شوې ده.

هغه وايي: ((ما په خپلو سترګو وليدل چې شپږ کسه يې وژل شوي او پنځه نور يې زخميان وو.))

افغان او پاکستاني چارواکو تر اوسه په دې اړه څه نه دي ويلي.

د يادونې ده، په دې وروستيو کې د ډيورنډ فرضي کرښې په اوږدو کې پاکستاني پوځيان سلګونه متره د افغانستان په خاوره کې مخې ته راغلي دي.