کابل (پژواک، ١٧ تله ٩٧): د افغانستان ولسمشر اشرف غني او نورو مشرانو تر ليدنو کتنو وروسته د افغان سولې لپاره د امريکا ځانګړى استازى زلمى خليلزاد اسلام اباد ته رسېدلى دى.
په اسلام اباد کې د امريکا سفارت له خوا د تلې په ١٧مه په يوه خپره شوې خبرپاڼه کې راغلي چې د افغان سولې او طالبان د خبرو اترو مېز ته د راوستلو په موخه زلمى خليلزاد به له پاکستاني مشرانو سره هم وګوري.
سرچينې زياته کړې چې خليلزاد به د پاکستان له لومړي وزير عمران خان، د پوځ له مشر جنرال قمر باجوه او ځينو نورو سياسي مشرانو وويني.
بلخوا اسلام اباد ته له رسېدو سره سم زلمي خليلزاد په پاکستان کې د افغانستان له سفير ډاکتر عمر زاخېلوال سره ليدلي دي.
زاخېلوال په خپله فېسبوک پاڼه کې ليکلي چې په دې ليدنه کې په افغانستان کې د امريکا او ناټو ځواکونو عمومي قوماندان جنرال سکاټ مېلر او په پاکستان کې د امريکا سفير پال جونز هم شتون درلود.
هغه زياته کړې چې په کتنه کې د سولې پر هلو ځلو، فرصتونو، ننګونو او د سولې پروسې پر ګڼو ابعادو او راتلونکو ګامونو مفصلې خبرې وشوې.
login or register a new account.
