ولسمشر غني نن سهار پکتيکا ولايت ته رسېدلى دى

ښرنه(پژواک، ١٢ لړم٩٧): ولسمشر محمد اشرف غني نن سهار د يو لوړ پوړي دولتي پلاوي په مشرۍ پکتيکا ولايت ته رسېدلى دى.

ولسمشر محمد اشرف غني پکتيکا ته په رسېدو سره د دغه ولايت د مقام لپاره جوړه شوې نوې ودانۍ پرانيستله.

دغه ودانۍ په ١٣ميليونه افغانۍ په دوو پوړونو کې په اساسي او معياري ډول جوړه شوې ده.

ټاکل شوې ده چې ولسمشر محمد غني د دغه سفر په ترڅ کې د دې ولايت له پوځي او ملکي چارواکو سره بېلابېلې ناستې ولري.

د يادونې ده چې ولسمشر به له غرمې وروسته د خلکو يوې لويې غونډې ته وينا هم وکړي.

په دې اړه به نور جزييات وروسته خپاره شي.