کابل (پژواک، ٢٩ لېندۍ ٩٧): د افغانستان د ملي امنيت سلاکار وايي چې افغانان په بېړه د سولې تړون نه غواړي، په سوله کې بايد د افغانانو قربانۍ په نظر کې ونيول شي.
د ملي امنيت سلاکار ډاکتر حمدالله محب د لېندۍ په ٢٩مه په ټولنيزه شبکه ټويټر کې ليکلي، د افغانستان خلک باید ډاډه و اوسي، چې سوله د ټولو غوښتنه ده او دا هغه څه دي چې دوى ورته د رسېدو لپاره هڅه کوي.
هغه زياته کړې: ((د همدې هيلې لپاره افغان حکومت د سولې لپاره جدي هلې ځلې کوي او سوله راتلونکې ده.))
محب ليکلي د افغانستان خلک د تل پاتې سولې غوښتونکي دي، نه د داسې یوې معاملې چې د افغانانو قربانۍ له پامه وغورځوي. د سولې لپاره هڅې سټراټېژيک زغم او زړورتیا ته اړتیا لري، نه بې لارې بدلون ته.؛
محب په دې برخه کې په ځانګړې توګه له امريکا، سعودي او متحده عربي اماراتو د هغوى له وروستيو هڅو مننه کړې چې د افغان سولې لپاره يې کړې دي.
خو هغه زياته کړې: ((د سولې په اړه وروستۍ څرګندونې او حدس ځيني وخت ناسم لوري ته بيايي، د دې بايد سپيناوى وشي.))
د ملي امنيت سلاکار وايي، د افغان سولې په اړه ټولې هڅې جدي نيول کېږي، دا د نوي افغانستان يوه برخه ده، د امريکا په ګډون د ټولو نړيوالو همکارانو هڅې د ستايلو دي.
هغه زياته کړې: ((د امريکا او افغانستان اړيکې د دوه اړخيز امنيتي تړون له مخې چې د افغان ولس، لويې جرګې، مشرانو جرګې او ولسي جرګې له خوا يې ملاتړ شوى، پر مخ وړل کېږي.
د نوموړي په وينا، د يوه خپلواک هېواد په توګه هېڅ بل هېواد او اشخاص دا حق نه لري چې په افغانستان کې د يوه نوي حکومت پر پلان او ساختار له چا سره خبرې وکړي او دغه کارونه د افغانستان د اساسي قانون خلاف دي.
حمدالله محب ويلي، د افغانستان د راتلونکې په اړه پرېکړه په خپله افغانان او د هغوى منتخب مشران کولى شي، د يوه منتخب حکومت بل بديل نشته.
ده زياته کړې: ((د افغانانو پر قربانيو هېڅ تړون نه کېږي.))
د يادونې ده، په دې وروستيو کې په متحده عربي اماراتو کې د افغان سولې په اړه څو ناستې شوې دي.
login or register a new account.
