ترينکوټ (پژواک، ١٨ مرغومى ٩٩) : د اروزګان ولايت په مرکز ترينکوټ ښار کې د ملي اردو پر يوه مرکز موټر بريدکې شپږ سرتېري وژل شوي دي.
د دغه ولايت يوې امنيتي سرچينې چې د نوم له څرګندولو يې ډډه کوله، د مرغومي په ١٨مه، پژواک اژانس ته وويل چې دغه بريد پرون ماښام د ترينکوټ د صوفيانو په سيمه کې د هاموې پوځي موټر په وسيله شوى دى.
سرچينې زياته کړه چې په دغه بريد کې څلور پوليس او دوه د اردو سرتېري وژل شوي او يو شمېر نور ټپيان دي.
د اروزګان د ولايتي شورا مرستيال محمد کريم کريمي د بريد د تاييد ترڅنګ پژواک ته وويل چې ډېره زوروره چاودنه شوې او غږ يې تر لرې سيمو پورې اورېدل شوى دى.
وسله والو طالبانو تر اوسه په دې اړه څه نه دي ويلي.
Views: 5
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن