کابل (پژواک، ۱۱ چنګاښ ۱۴۰۰): د پروان سیمه ییز مسوولین تاییدوي چې بهرني ځواکونه نن سهار د بګرام له هوايي وتلي او ټاکل شوې ده د دغه ډګر مسوولیت ډېر ژر افغان ځواکونه په لاس کې واخلي.
د بګرام ولسوال لالا شېرین رووفي پژواک خبري اژانس ته وویل چې بهرنیو ځواکونو نن سهار بګرام هوايي ډګر پرېښود.
هغه زیاته کړه، وروسته له هغه چې بهرني ځواکونه د بګرام له هوايي ډګره ووتل، د سیمې یو شمېر خلک یاد میدان ته دننه شول او ځيني وسایل یې یووړل، خو امنیتي ځواکونو د هغو مخه ونیوله او د دې موضوع په تړاو یې دوه تنه ونیول.
د بګرام ولسوال په دې اړه چې خلکو څومره وسایل او توکي غلا کړي؟ جزئیات ور نه کړل.
په عین حال کې په پروان کې د ملي اردو سرتېرو د جلب او جذب قوماندان عبدالحمید ترین هم تایید کړه چې بهرنیو ځواکونو نن سهار د بګرام له هوايي ډګره ووتل.
هغه وویل چې د ترخیص شوو ۱۵۰۰ کسانو د جلب او جذب پروسه له څه مودې راهیسې پیل شوې او ټاکل شوې په څو ورځو کې د دغه میدان مسوولیت یوه اووه کسیز کنډک ته وسپارل شي.
د نوموړي په خبره، له دې مخکې هم د ملي اردو سرتېري په دغه میدان کې مېشت وو.
د امریکا او طالبانو ترمنځ د فبرورۍ د هوکړې پر اساس چې ټول امریکايي ځواکونه د ۲۰۲۱ کال تر نیمايي له افغانستانه وځي.
د نړیوالو ځواکونو دغه اډه شاوخوا دوه لسیزې مخکې رامنځته شوې وه.
Views: 42
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن