کابل (پژواک، ۲۶ زمری ۱۴۰۱): د چارو اداره وایي، دولتي کارمندان باید له دې وروسته د بهرنیو چارو وزارت له خوا د سفر تایید او خپل اړین اسناد د ریاست الوزراء مقام ته د موافقې لپاره وړاندې کړي.
د چارو ادارې په خبرپاڼه کې راغلي، نن د بهرنیو اړیکو د چارو انسجام ریاست او د چارو ادارې عمومي ریاست د فرهنګي او ټولنیزو چارو ریاست ترمنځ، د مختلفو وزارتونو له استازو سره د دولتي کارمندانو د بهرنیو سفرونو د ستونزو هواري په موخه ناسته وشوه.
سرچینې لیکلي، په دغه ناسته کې د چارو عمومي ادارې د فرهنګي او ټولنیزو چارو رییس مولوي عبدالباقي منصور وویل، اسلامي امارت د دولتي ادارو د ستونزو د هواري هڅه کوي او ټولې دولتي ادارې باید د خپلو ستونزو د حل کولو په موخه له یو بل سره په اړیکه کې وي.
په خبرپاڼه کې راغلي چې په دغه ناسته کې د چارو عمومي ادارې د بهرنیو اړیکو د انسجام رییس مولوي احمدالله امین هم ویلي چې سفر کوونکی کارمند باید خپل وړاندیز د سفر لپاره د ټولو اړینو اسنادو له چمتو کولو او د سفر د نوعیت او موخې واضحه کولو او د بهرنیو چارو وزارت له تاییدي وروسته، د موافقې لپاره د ریاست الوزراء مقام ته وړاندې کړي.
سرچینې لیکلي، دغهراز په دغه ناسته کې پرېکړه وشوه چې اړوند وزارتونه دې د رسمي سفرونو له ترسره کېدو وروسته دې د ریاست الوزرا مقام ته د خپل سفر ټول راپور وړاندې کړي او د سفر موخو او لاسته راوړنو په اړه دې معلومات ورکړي.
GET IN TOUCH
NEWSLETTER
SUGGEST A STORY
PAJHWOK MOBILE APP