کابل (پژواک، ۲۶ لړم ۱۴۰۱): سیګار، د سولې خبرو کې د تېر افغان حکومت نه ګډون، پخلاینې ته د طالبانو نه لېوالتیا او په جمهوري نظام کې د هغوی پر شاملولو ټینګار، په تېر حکومت کې پراخ فساد او له افغانستانه د امریکایانو ایستلو پر جدیت د پخواني چارواکو نه پوهېدل، د تېر حکومت د ړنګېدو لاملونه بولي.
دغه راز سیګار وايي، د مخکني نظام د سقوط یو لامل د هېواد له شرایطو د مخکني ولسمشر محمداشرف غني لرې پاتې کېدل او ده ته د نږدې کسانو په کوچنۍ حلقه کې محصور پاتې کېدل هم بللي دي.
د افغانستان بیارغونې لپاره د امریکا ځانګړي څارونکي دفتر (سیګار) په خپل راپور کې د مخکني افغان حکومت د پرځېدو لاملونه ارزولي او په اړه یې راپور خپور کړی دی.
په راپور کې راغلي، د پخواني ولسمشر محمداشرف غني حکومت د ړنګېدو یو لامل د هغه مهال د افغان واکمنانو پر دې نه پوهېدل بللي چې امریکایان له افغانستانه د وتلو په تړاو جدي دي.
سرچينه زياتوي: «د امریکا او طالبانو په خبرو کې د افغانستان د تېر حکومت نه ګډون، پخلاینې ته د طالبانو نه لېوالتیا او په جمهوري نظام کې د طالبانو پر شاملولو ټینګار د مخکني حکومت د سقوط نور لاملونه ښودل شوي دي. دغه راز، په تېر حکومت کې پراخ فساد هم د نظام پاشل کېدو مهم دلیل و.»
سیګار ویلي، دا راپور چې د امریکا کانګرېس لپاره یې چمتو کړی، له شپیتو ډېرو پخواني افغان او امریکايي چارواکو او دغه راز د افغانستان چارو له ځینو کارپوهانو سره یې د مرکو پر بنسټ چمتو کړی دی.
په راپور کې ویل شوي، له افغانستان سره د امریکا شلکلنې مرستې او پر بهرنیو مرستو د دغه هېواد ډېره تکیه د دې لامل شوه چې افغان مشرانو او سیاستوالو له دې مرستو پرته د راتلونکي تصور نه کاوه، له همدې کبله له افغانستانه د امریکا وتلو وضعیت ته چمتو نه وو.
د راپور په یوه برخه کې د افغانستان لانجې د سیاسي حل لپاره د امریکا هڅو ته هم اشاره شوې او په کې ویل شوي چې له امریکا سره له خبرو مخکې له تېر افغان حکومت سره له خبرو د «طالبانو» ډډه کول سولې ته د رسېدو پر وړاندې خنډ وګرځېد.
سرچینه لیکي، د دوحې د سولې په خبرو کې د تېر جمهوري حکومت نه شاملول، په مذاکراتو کې د دغه حکومت د دریځ کمزوري کېدو او د اسلامي امارت دریځ د پیاوړتیا لامل شول.
د سیګار په وینا، غني تمه درلوده چې د امریکا نوی حکومت به له افغانستانه د امریکايي ځواکونو ایستلو په تړاو د امریکا مخکني ولسمشر ډونالډ ټرمپ پالیسي لغوه کړي.
سیګار وايي، د مخکني نظام د سقوط یو لامل د هېواد له شرایطو د مخکني ولسمشر غني لرې پاتې کېدل او هغه ته د نږدې کسانو په کوچنۍ حلقه کې محصور پاتې کېدل هم و.
په راپور کې د افغانستان لپاره د امریکا حکومت اقداماتو ته هم اشاره شوې ده.
سرچینه زیاتوي، د امریکا حکومت غوښتل په افغانستان کې یو جمهوري، ثباتلرونکی، ټولشمول او ځوابورکوونکی حکومت رامنځته کړي، خو دغه هدف ته په رسېدو کې پاتې راغی.
Views: 325
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن