<p style="text-align: justify;">اټلانټا (پژواک، ۲۶ کب ۱۴۰۱): د امریکا یو لوړپوړی پوځي قوماندان وایي چې داعش ښايي په راتلونکي کې له افغانستانه د امریکا او متحدینو ګټې په نښه کړي خو اسلامي امارت دا خبره ردوي.</p>
<p style="text-align: justify;">د ازادي راډیو د خبر له مخې، په منځني ختیځ کې د امریکا جګپوړي قوماندان مایکل کوریلا ویلي، د داعش خراسان څانګه چې په افغانستان کې ده، تر راتلونکو شپږو میاشتو ښايي وتوانېږي د امریکا او نورو لوېدیځو هېوادونو ګټې په نښه کړي او بریدونه وکړي.</p>
<p style="text-align: justify;">هغه پرون د پنجشنبې په ورځ د خپل هېواد د سنا امنیتي کمېټې ته ویلي، د داعش ډله به په اروپا او سیا کې په ډېرې چټکۍ د عملیاتو ترسره کولو وړتیا پيدا کړي خو وايي چې په نږدې راتلونکي کې پر امریکا برید نه شي کولای.</p>
<p style="text-align: justify;">جنرال مایکل ویلي: «دا به د داعش لپاره خورا ستونزمنه وي چې زموږ په هېواد کې عملیات ترسره کړي.»</p>
<p style="text-align: justify;">خو نوموړي د داعش له خوا له دغه هېواده بهر د امریکايي اتباعو ژوند ته د ګواښ په اړه هم اشاره کړې، ویلي یې دي: «زما د قوماندانانو ارزونه دا ده چې داعش کولای شي بریدونه وکړي؛ پرته له کومې خبرتیا به په شپږو میاشتو کې د امریکا یا غربي هېوادونو پر ضد زموږ له خاورې بهر د پولې په اوږدو کې عملیات ترسره کړي، خو دا به د داعش لپاره خورا ستونزمنه وي چې زموږ په هېواد کې دننه عملیات ترسره کړي.»</p>
<p style="text-align: justify;">جنرال کوریلا ټینګار وکړ چې سلګونه زره امریکايي اتباع به چې په بهر کې ژوند کوي، له بریدونو سره مخ شي.</p>
<p style="text-align: justify;">د هغه په وینا، له افغانستانه بهر د داعش خراسان څانګې بریدونو مخنیوي لپاره په افغانستان کې د دې ډلې پر ضد د عملیاتو لپاره مالي ملاتړ ته اړتیا ده.</p>
<p style="text-align: justify;">خو د افغانستان اسلامي امارت د نوموړي دا څرګندونې نه مني.</p>
<p style="text-align: justify;">د امارت ویاند ذبیحالله مجاهد وایي، امریکا په ورته څرګندونو کې په یو شکل داعش ته کمپاین کوي.</p>
<p style="text-align: justify;">هغه ازادي راډيو ته ویلي: «موږ دا ادعاوې ردوو؛ افغانستان نور د هیچا لپاره داسې ځای نه دی چې له دې ځایه چا ته کوم ګواښ وي او یا هم ورته کومه ستونزه رامنځته کړي؛ دا اوس داعش په افغانستان کې د نابودۍ په حالت کې دی او ډېرې شدیدې ضربې یې ولیدې او پر دې نړۍ پوهېږي؛ زما په نظر د امریکا نظامي مسوولینو ورته څرګندونې په یو شکل کمپاین دی، د داعش لپاره.»</p>
<p style="text-align: justify;"></p>
