پنځو ولایتونو کې ترافیکي پېښې؛ درې کسان مړه او ۳۵ نور ټپیان شوي

[restrict paid="true"]

<p style="text-align: justify;">کابل (پژواک، د تلې لومړۍ نېټه ۱۴۰۲): په ننګرهار ، لغمان، بادغیس او نیمروز  ولایتونو کې د ترافیکي پېښو له امله ۳۸ کسانو ته مرګ‌ژوبله اوښتې ده.</p>

<p style="text-align: justify;">د ننګرهار امنيې قوماندانۍ وياند عبدالبصير زابلي د تلې په لومړۍ نېټه پژواک خبري اژانس ته وويل، نن مازديګر د جلال‌اباد – تورخم پر لويه لاره د مومندرې ولسوالۍ اړوند په شهيد موړ سيمه کې يو ټوډي موټر د تېزې تګ له امله چپه شوی دی.</p>

<p style="text-align: justify;">هغه زياته کړه، په دې پېښه کې يو کس مړ شوی او ۴ نور ټپيان دي.</p>

<p style="text-align: justify;">نوموړی دغه راز وايي، نن له غرمې مخکې هم د جلال‌اباد – تورخم لويې لارې په اوږدو کې د نهمې ناحيې اړوند سورخ دېوال سيمه کې يو ټوډي او سراچه موټرو ټکر کړی دی.</p>

<p style="text-align: justify;">د هغه په وینا، په دې پېښه کې څلور کسان ټپيان شوي دي.</p>

<p style="text-align: justify;">د زابلي د معلوماتو له مخې، د دغو دواړو پېښو ټپيان د جلال اباد حوزوي روغتون ته د درملنې لپاره لېږدول شوي دي.</p>

<p style="text-align: justify;">د يو بل خبر له مخې نن ماښام شاوخوا ۷ بجې د کابل – جلال‌اباد لویې لارې اړوند د لغمان د قرغيو ولسوالۍ په خېروخېلو سيمه کې هم د زرنج موټرسايکل او فلاینکوچ موټر ترمنځ ټکر شوی دی.</p>

<p style="text-align: justify;">د لغمان امنیې قوماندانۍ وياند يونس يوسفزي پژواک ته وويل، په پېښه کې د يوه ماشوم او يوې مېرمنې په ګډون پنځه کسان ټپيان شوي دي.</p>

<p style="text-align: justify;">د کابل – جلال‌اباد او جلال‌اباد – تورخم يو له خونړيو لارو دي چې ډېر کله په کې د موټرچلوونکو د ګړندي تګ او بې احتياطۍ له امله ترافيکي پېښې کېږي.</p>

<p style="text-align: justify;">بلخوا ځایي چارواکو ویلي چې د نیمروز په غورغوري سیمه کې د سپرلیو ۴۰۴ ډوله موټر له سړکه اوښتی او چپه شوی دی.</p>

<p style="text-align: justify;">ځایي سرچینو ویلي، په دې پېښه کې یو کس مړ او ۱۸ نور ټپیان شوي چې په کې ښځې او ماشومان هم شامل دي.</p>

<p style="text-align: justify;">د سرچینو معلوماتو له مخې، ټپیان د زرنج روغتون ته لېږدول شوي او د هغوی روغتیایي حالت د اندېښنې وړ ښودل شوی دي.</p>

<p style="text-align: justify;">د یو بل خبر له مخې، د بادغیس په مرکز قلعه‌نو کې د یوې ترافیکي پېښې له امله یو کس مړ شوی دی.</p>

<p style="text-align: justify;">دغه راز په پروان کې هم په دوو ترافیکي پېښو کې پنځه کسان ټپیان شوي دي.</p>

<p style="text-align: justify;">د پروان امنیې قوماندانۍ له خوا په خپره شوې خبرپاڼه کې راغلي، لومړۍ پېښه د پروان اړوند د ده قاضي سیمه کې د یو کرولا او موټرسایکل ترمنځ شوې ده چې په پایله کې یې دوه موټرسایکل سپاره ټپیان شوي دي.</p>

<p style="text-align: justify;">بلخوا د یاد ولایت مرکز چاریکارو ښار کې د یوې ريکشاء او سوزوکي موټر ترمنځ ټکر شوی چې په پایله کې یې درې کسان ټپیان شوي دي.</p>

<p style="text-align: justify;">د یادونې ده، په دې وروستیو کې د هېوا په بېلابېلو سیمو کې ترافیکي پېښې زیاتې شوې دي. د پژواک د خپرو شوو راپورونو له مخې، د روان لمریز کال له پیله راهیسې په ټول هېواد کې شاوخوا څلور زره کسانو ته د ترافیکي پېښو له امله مرګ‌ژوبله اوښتې ده.</p>

[/restrict]