متقي له خپل ایراني سیال سره د افغان کډوالو او بندیانو پر ستونزو غږېدلی

[restrict paid="true"]

<p style="text-align: justify;">کابل (پژواک، ۳ مرغومی ۱۴۰۲): د بهرنیو چارو سرپرست وزیر له خپل ایراني سیال سره په دغه هېواد کې د افغان بندیانو او کډوالو وضعیت او ستونزو د حل په موخه مفصلي خبرې کړې دي.</p>

<p style="text-align: justify;">د بهرنیو چارو وزارت مرستیال ویاند حافظ ضیاءاحمد تکل د مرغومي په ۳مه د شپې ناوخته پر اېکس‌پاڼه لیکلي، د بهرنیو چارو وزیر مولوي امیرخان متقي نن په تهران کې له خپل ایراني سیال حسین امیر عبداللهیان سره ولیدل.</p>

<p style="text-align: justify;">سرچینې زیاته کړې، عبداللهیان له افغان پلاوي مننه وکړه چې تېره ورځ یې د فلسطین قضیې په تړاو جوړ شوي کنفرانس کې ګډون او اغېزناکه وینا وکړه.</p>

<p style="text-align: justify;">دغه راز د ایران بهرنیو چارو وزیر د فلسطین قضیې په تړاو د اسلامي امارت د مثبت دریځ ستاینه وکړه.</p>

<p style="text-align: justify;">امیرخان متقي د افغانستان او ایران ترمنځ په سیاسي، اقتصادي، تجارتي او ترانزیټي اړیکو کې د لا پیاوړتیا په موخه د مؤثرو اقداماتو یادونه وکړه.</p>

<p style="text-align: justify;">هغه په ایران کې د افغان بندیانو او مهاجرینو د وضعیت او ستونزو د حل په موخه له خپل ایراني سیال سره مفصلې خبرې وکړې او د یادو مواردو په اړه د ایراني سیال له لوري د همکارۍ ډاډ ورکړل شو.</p>

<p style="text-align: justify;">د ناستې په پای کي دواړو لورو د افغانستان - ایران د ډيپلوماتيکو اړیکو کچې په لوړېدا هم خبرې اترې ترسره کړې.</p>

[/restrict]